Að undanförnu hefur heimilis- og dagdeildarfólk á Höfða heimsótt Byggðasafnið að Görðum.

Margt gladdi Höfðafólk á byggðasafninu, ekki síst Axelsbúð þar sem menn fengu sér sæti á gamla trébekknum og fengu sér kók úr goskælinum sem var hluti af Axelsbúð um áratugaskeið.

Þessar heimsóknir á byggðasafnið hafa gert mikla lukku, enda er safnið af flestum talið eitt allra besta byggðasafn á landinu.

Starfsfólk dagvistar, þær Emilía P.Árnadóttir, Arinbjörg Kristinsdóttir og Marianne Ellingsen höfðu veg og vanda af þessum heimsóknum.

Í vetur verður spilað og teflt á Höfða hvern miðvikudag kl. 14-16. Þessi starfsemi hófst í síðustu viku. Ingibjörg og María stjórna þessum spila- og taflfundum. Í dag var vel mætt, spilað á 6 borðum og teflt á einu borði. Létt var yfir fólki við spilamennskuna og góðir taktar sáust á sumum borðum, enda margir spilarar með áratuga reynslu við græna borðið.

Í dag heimsótti Höfða 10 manna hópur sveitarstjórnarmanna og embættismanna frá Sörvogi, vinabæ Akraness í Færeyjum. Í fylgd með þeim voru 2 fulltrúar Akraneskaupstaðar, Rakel Óskarsdóttir og Hörður K.Jóhannesson.

Gestirnir gáfu sér góðan tíma til að skoða heimilið og hrifust af því sem fyrir augu bar. Að skoðun lokinni snæddu þeir hádegisverð í mötuneyti Höfða og hældu mjög þeim góða mat sem Bjarni bryti og hans fólk bar fram.

Margrét A.Guðmundsdóttir, Guðjón Guðmundsson og Jóhannes Ingibjartsson tóku á móti þessum góðu gestum.

Eins og kunnugt er stendur Dvalarheimilið Höfði í landi Sólmundarhöfða og dregur nafn sitt af höfðanum. Á Sólmundarhöfða voru á árum áður nokkrir bæir en nú er aðeins einn eftir. Þar hefur Sigursteinn Árnason búið síðan hann fæddist í nóvember árið 1915. Í gær var þessi níræði höfðingi að slá túnið sitt með orfi og ljá og gekk rösklega til verks.

Sigursteinn er góður nágranni sem kíkir oft inn á Höfða í kaffisopa og létt spjall við íbúa og starfsmenn. Þá færir hann heimilinu reglulega afbragðs rabarbara sem hann ræktar.

3 krakkar komu færandi hendi á Höfða í morgun. Þau héldu hlutaveltu í anddyri Nettó og gáfu Höfða afraksturinn, 4.741 kr.

Þessum ungu Akurnesingum er færðar kærar þakkir fyrir hlýhug í garð Höfða.

Mynd: f.v. Hinrik Már Guðráðsson, Júlíana Karvelsdóttir, Þorbjörg Eva Ellingsen

Stóra blómabeðið sunnan við Höfða skartar sínu fegursta þessa dagana. Elísabet sjúkraþjálfari og Erla aðstoðarmaður hennar komu upp þessu beði fyrir nokkrum árum með aðstoð nokkura íbúa og starfsmanna Höfða. Hafa þær stöllur annast blómabeðið af mikilli natni og alúð í samráði við íbúa hússins.

Í gær heimsótti Höfða um 20 manna hópur eldri borgara frá vinabæ Akraness á Grænlandi, Qagortog. Gestirnir skoðuðu heimilið, sungu nokkur lög í matsal, sýndu handverk og þáðu kaffi og meðlæti.

Í dag komu saman í iðjuþjálfun 6 konur af hjúkrunardeild og bökuðu vöfflur með Ingibjörgu iðjuþjálfa. Síðan var sest að veitingum, drukkið kaffi með rjómavöfflum og spjallað um heima og geyma.

Svo mikill var krafturinn í bakstrinum að brunavarnakerfi fór í gang. Húsverðir brugðust skjótt við og stoppuðu baksturinn í miðjum klíðum.

Góðir gestir frá Grænlandi

Í gær heimsótti Höfða rúmlega 20 manna hópur frá Qagortog, vinabæ Akraness í Grænlandi. Hópurinn skoðaði heimilið og lýsti mikilli aðdáun á aðbúnaði öllum.

Að lokinni skoðun sungu Grænlendingarnir og dönsuðu þjóðdansa í samkomusal Höfða. Ung stúlka lék á fiðlu og kona á níræðisaldri lék á harmonikku. Undirtektir íbúa Höfða voru frábærar og klöppuðu þeir listamennina upp aftur og aftur.

Að lokum bauð Höfði gestunum upp á kaffi og meðlæti.

Einar Oddur Kristjánsson alþingismaður, varaformaður fjárlaganefndar Alþingis, heimsótti Höfða í gær. Einar Oddur ræddi við Benedikt Jónmundsson formann stjórnar Höfða og Guðjón Guðmundsson framkvæmdastjóra um stöðu Höfða og starfsemi heimilisins.