Rausnarleg gjöf

Um þessi áramót leggst af starfsemi STAK (Starfsmannafélags Akraneskaupstaðar) og félagið verður deild í Starfsmannafélagi Reykjavíkurborgar. Við þessi tímamót ákvað stjórn STAK að færa nokkrum stofnunum á Akranesi peningagjafir til ákveðinna verkefna. M.a. voru Höfða færðar 700 þúsund krónur til að bæta aðbúnað starsfmanna og íbúa.

Við athöfn í bæjarþingsalnum í morgun afhenti Valdimar Þorvaldsson formaður STAK fulltrúum viðkomandi stofnana gjafirnar, en alls gaf STAK 5 milljónir króna.

Guðjón Guðmundsson veitti gjöfinni til Höfða viðtöku og þakkaði þessa rausnarlegu gjöf. Guðjón lýsti ánægju með að munað væri eftir starfsmönnum Höfða á þessum tímamótum, en alls störfuðu 59 félagar STAK á Höfða og væru þeir um 2/3 af starfsliði heimilisins.Guðjón sagði að samhent og öflugt starfslið væri einn helsti styrkleiki Höfða og minnti viðstadda á að Höfði væri eitt af því sem Skagamenn gætu verið stoltir af.

Piparkökuhús á Höfða

 

Skagakonan Valdís Einarsdóttir sigraði í 8.skipti í piparkökuhúsakeppni Kötlu nú fyrir jólin. Að þessu sinni var verðlaunahúsið líkan af Höfða, móttökuhúsi Reykjavíkurborgar. Margir hafa skoðað húsið síðan það var sett upp í gær og eru allir sammála um að þetta sé snilldar handverk

Verðlaunahús Valdísar verður til sýnis á Höfða fram yfir áramót og fer vel á því að Reykjavíkur Höfði sé sýndur á Höfða Akranesi.

Þess má geta að Valdís er dóttir Sigríðar Jónsdóttur og tengdadóttir Herdísar Ólafsdóttur, sem báðar búa á Höfða.

Tækjagjöf

 

MND samtökin á Íslandi hafa að undanförnu staðið fyrir söfnun notaðra hjálpartækja til að senda MND félaginu í Mongólíu.

Ingibjörg Ólafsdóttir iðjuþjálfi og Elísabet Ragnarsdóttirsjúkraþjálfari hafa tekið til tæki sem hætt er að nota á Höfða og voru þau afhent Guðjóni Sigurðssyni formanni MND samtakanna á Íslandi í dag.

Tækin sem gefin voru eru hjólastóll, göngugrindur, hækju, stafir og salernisupphækkanir.

Jólaball

Í dag var haldið jólaball fyrir börn og barnabörn íbúa og starfsmanna Höfða. Jólasveinarnir Kertasníkir og Skyrgámur komu í heimsókn og dansað var í kringum jólatréð. Börnin fengu gos og poka með góðgæti og foreldrarnir kaffi og smákökur.

Gísli S.Einarsson bæjarstjóri stjórnaði jólaballinu af sinni alkunnu snilld, en Gísli hefur stjórnað jólaböllunum á Höfða eins lengi og elstu menn muna. Hann hefur einnig verið óþreytandi við að skemmta íbúum Höfða við ýmis tækifæri svo sem Höfðagleði, kökukvöld, kaffihúsakvöld o.fl. Er ástæða til að þakka Gísla fyrir þá ræktarsemi sem hann sýnir fólkinu á Höfða.

Unga fólkið og foreldrarnir troðfylltu samkomusalinn á Höfða og var það mál manna að aldrei hefðu fleiri sótt jólaballið en að þessu sinni.

Hátíðamatseðill

 

Eins og tíðkast á öllum góðum heimilum verður boðið upp á veislumat á Höfða um jól og áramót. Nú hefur Bjarni bryti gefið út glæsilegan hátíðamatseðil sem afhentur er öllum íbúum hússins.

Eins og sjá má á matseðlinum verða bragðlaukar íbúa og starfsmanna kitlaðir af krafti um hátíðarnar. Á Þorláksmessu verður svo skötuveisla.

 

Annir á fótaaðgerðastofu

Mikil törn er um þessar mundir hjá Guðrúnu fótasérfræðingi, enda vilja flestir vera án líkþorna og óþæginda um jólin. Þegar ljósmyndara bar að garði var Guðrún önnum kafin og að sögn Bjarna bryta mun hún vera að eiga við tær Antons Ottesen varaformanns stjórnar Höfða á myndinni sem fylgir með þessari frétt!

Jólaannir á hárgreiðslustofunni

Þessa dagana er mikið að gera hjá Guðnýju hárgreiðslukonu sem stendur myrkranna á milli við að klippa og snyrta íbúa og starfsmenn Höfða fyrir jólin og einnig fyrir fólk utan úr bæ. Við smelltum mynd af henni þegar hún var að eiga við höfuð Elísabetar sjúkraþjálfara.

Gjöf frá nemendum Grundaskóla

Í morgun komu fjórir nemendur Grundaskóla í heimsókn á Höfða og færðu heimilinu forkunnarfagran handunninn engil og skreyttan poka, en hvort tveggja var unnið af nemendum skólans.

Nemendur Grundaskóla hafa heimsótt Höfða fyrir hver jól í fjölda ára og fært heimilinu fallega hluti gerða af nemendum. Þessar góðu gjafir prýða Höfða.

Höfði færir nemendum Grundaskóla kærar þakkir fyrir þessar góðu gjafir og þann hlýhug sem þeim fylgja.

Mynd frá vinstri: Elsa María Gunnlaugsdóttir, Eva Ösp Sæmundsdóttir, Særós Ýr Þráinsdóttir, Guðrún Ýr Bjarnadóttir og Guðbjartur Hannesson skólastjóri Grundaskóla.

Fræðsla fyrir starfsfólk

Fræðsla fyrir starfsfólk Höfða er konin í gang á ný eftir langt sumarfrí og hafa nokkrir fræðslufundir verið haldnir síðasta mánuðinn.

14.nóvember komu starfsmenn frá Sjónstöð Íslands, þær Vala Jóna Garðarsdóttir og Kristín Gunnarsdóttir og fræddu okkur um sjónstöðina, um hjálpartæki fyrir blinda og sjónskerta og umgengni við sjónskerta.

28.nóvember fjallaði Elísabet Ragnarsdóttir sjúkraþjálfari Höfða um byltur aldraðra. Talað var um áhættuþætti byltna og varnir gegn þeim.

12.desember kom Björn Gunnarsson læknir SHA og fræddi okkur um verkjalyf, allt frá Opium til nútímalegri verkjalyfja. Fjallað var um notkun þeirra, aukaverkanir o.fl.

Fræðslufundir halda áfram á nýju ári.