Mjög góð grænmetisuppskera var í sumar í nýju gróðurkössunum á lóð Höfða. Hafa starfsmenn gætt sér á grænmetinu með hádegismatnum undanfarnar vikur. Þá uxu fyrstu eplin á eplatrjánum sem sett voru niður í fyrra.
Í lok ágúst heimilaði Velferðarráðuneytið Höfða að fjölga dvalarrýmum um þrjú frá og með 1.september. Þar með hefur þeim fimm rýmum sem tekin voru af Höfða í ársbyrjun 2011 verið skilað aftur, en tveimur hjúkrunarrýmum var skilað í ársbyrjun 2012 samfara lokun E-deildar sjúkrahússins á Akranesi.
Fjölgun dvalarrýma kemur sér vel þar sem yfir 30 manns eru á biðlista fyrir vistun á Höfða.
Ásmundur Einar Daðason og Eygló Harðardóttir þingmenn Framsóknarflokksins heimsóttu Höfða í gær ásamt Guðmundi Páli Jónssyni formanni bæjarráðs Akraness.
Gestirnir heilsuðu upp á íbúa og dagdeildarfólk og funduðu með stjórnendum Höfða.
Í dag naut Höfðafólks blíðviðrisins á stéttinni sunnan við Höfða. Jón Heiðar lék þar gömlu góðu lögin á harmonikku og sumir stigu dans. Boðið var upp á léttar veitingar. Milli 60 og 70 manns mættu og skemmtu sér vel.
S.l. föstudag heimsótti Höfða um 50 manna hópur fyrrverandi alþingismanna og maka, en hópurinn var í dagsferð á Akranesi. Guðjón Guðmundsson og Margrét A.Guðmundsdóttir tóku á móti gestunum og buðu upp á veitingar í Höfðasal þar sem þeim var kynnt starfsemi heimilisins. Guðrún Agnarsdóttir þakkaði fyrir hönd gestanna fyrir góðar móttökur.
Í gær hófust írskir dagar á Höfða með söngskemmtun Þorvaldar Halldórssonar sem skemmti Höfðafólki með gömlu góðu lögunum. Yfir 100 manns troðfylltu Höfðasalinn og tóku vel undir með Þorvaldi og sumir stigu dansspor. Boðið var upp á léttar veitingar í tilefni írsku daganna.
Þá hefur heimilið verið skreytt með írskum fánum, blöðrum o.fl. Írska stemmningin sem ríkir á Akranesi þessa helgi er því ekki síður á Höfða en annars staðar í bænum.
Hin árlega sumarferð Höfðafólks var farin í gær. 50 manns tóku þátt í ferðinni, íbúar Höfða og dagdeildarfólk ásamt nokkrum starfsmönnum. Lagt var af stað kl. 13 og ekið um Bessastaði, Álftanes, Hafnarfjörð og til Keflavíkur þar sem boðið var upp á kaffihlaðborð í Kaffi Duus. Eftir kaffið litu margir við í safni sem er í sama húsi, en þar má sjá á annað hundrað skipslíkön auk fjölda gamalla muna og ljósmynda frá liðinni tíð. Næst var ekið til Grindavíkur og þaðan um hinn nýja Suðurstrandarveg til Þorlákshafnar og síðan haldið heim um Þrengslin og með Hafravatni. Heim var svo komið kl. 18,50.
Á suðurleiðinni rigndi nokkuð á Kjalarnesi og til Kópavogs en eftir það var blíðskaparveður alla leið. Ferðast var með sérútbúinni hjólastólarútu frá Sæmundi. Leiðsögumaður var Björn Ingi Finsen og var leiðsögn hans stórskemmtileg og fróðleg.
Þóra Arnórsdóttir forsetaframbjóðandi heimsótti Höfða í dag. Með henni í för var Svavar Halldórsson eiginmaður Þóru og nýfædd dóttir þeirra.
Þóra hélt fund í Höfðasal þar sem hún ávarpaði Höfðafólk og síðan spjallaði hún við íbúa og starfsmenn.
Upptökulið frá þýska sjónvarpinu fylgdi frambjóðandanum og tók m.a. viðtöl við nokkra íbúa Höfða.
Herdís Þorgeirsdóttir forsetaframbjóðandi heimsótti Höfða í dag og spjallaði við íbúa og starfsmenn. Á myndinni heilsar Herdís upp á Freystein Jóhannsson en þau eru gamlir vinnufélagar af Morgunblaðinu.
Undanfarnar vikur hafa íbúar Höfða og dagdeildarfólk farið í daglegar gönguferðir um hið fagra umhverfi Höfða. Nú hefur ný gönguleið bæst við þær sem fyrir voru, en kominn er malbikaður gangstígur fram á Sólmundarhöfðann með fínum sólpalli þar sem fjöldi manns getur setið og notið góða veðursins.
Haraldur Sturlaugsson beitti sér fyrir þessari framkvæmd og safnaði til þess framlögum frá fjölda einstaklinga og fyrirtækja. Gaf Haraldur nýja gangstígnum nafnið Samfélagsstígurinn.
Ástæða er til að þakka Haraldi og öllum þeim sem lögðu þessu verkefni lið fyrir þessa frábæru viðbót við gönguleiðir í nágrenni Höfða.
