Hin árlega kvöldvaka sem starfsfólk Höfða býður íbúum til var haldin s.l. miðvikudagskvöld. Boðið var upp á kökur og góðgæti sem starfsmenn komu með að heiman og voru veitingar glæsilegar að vanda. Þetta árlega boð lýsir þeim góða anda sem ríkir á Höfða.

Guðjón setti skemmtunina og fór með kveðskap í léttum dúr og síðan rak hvert skemmtiatriðið annað: Magadansflokkur frá Mangó dansstúdíói sýndi listir sínar, þrjár ungar stúlkur Sunnar Rós Sigmundsdóttir, Aldís Eir Valgeirsdóttir og Aldís Lind Benediktsdóttir sungu nokkur lög, Margrét Saga söng nokkur lög, m.a. eitt frumsamið, við undirleik föður síns Gunnars Sturlu Hervarssonar og hópur dansara frá Feban sýndi línudans.

Skemmtinefnd skipuðu þær Erla B.Sveinsdóttir, Ester Theódórsdóttir, Gréta Jóhannesdóttir, Guðný S.Sigurðardóttir og Þórey Einarsdóttir.

Þetta skemmtikvöld tókst frábærlega vel og var mjög vel sótt af íbúum og starfsmönnum.

Síðdegis í dag var ball á Höfða. Hljómsveitin Bjórbandið lék og söng gömlu góðu lögin, en hljómsveitina skipa Baldur Árnason, Árni Aðalsteinsson, Helgi Jensson og Smári Guðbjartsson.

Mikil stemning var á ballinu og dansgólfið troðfullt allan tímann.

Næsta ball með bjórbandinu verður væntanlega í nóvember.

Í gær og fyrradag hafa íbúar Höfða staðið í sláturgerð með aðstoð nokkurra starfsmanna. Tekin voru 80 slátur. Fólk var einbeitt við sláturgerðina og handtökin fagmannleg. Augljóst var að þeir sem að sláturgerðinni stóðu hafa tekið slátur allan sinn búskap.

Sigríður Guðmundsdóttir lét sig ekki vanta í sláturgerðina og saumaði vambir af miklum krafti, en hún verður 100 ára eftir 4 mánuði. Var það mál manna að hún hefði allt að 90 ára reynslu af sláturgerð.

Létt var yfir mannskapnum og augljóst að allir höfðu af þessu gaman. Fyrsta sláturmáltíðin verður framreidd á morgun, en slátrið er sívinsæll matur hjá íbúum og starfsfólki Höfða.

Yfirblandari í sláturgerðinni var sem endranær Svandís Stefánsdóttir.

Íbúar Höfða voru með samverustund í samkomusalnum í dag. Þar flutti Gunnvör Björnsdóttir falleg ljóð, Guðrún Adolfsdóttir lék nokkur lög á píanó og flutt var veiðisaga eftir Kjartan Guðmundsson þar sem hann lýsir viðureign sinni við „þann stóra“ í Haukadalsá. Að lokum var leikinn af geisladiski rímnakveðskapur Steindórs Andersen.

Nemendur sérkennsludeildar Brekkubæjarskóla sem nefna sig Fjörfiska heimsóttu Höfða í gær ásamt leiðbeinendum sínum. Þeir skoðuðu heimilið í fylgd forstöðukonu sem bauð þeim upp á veitingar áður en þeir kvöddu.

Hin árlega sumarferð Höfðafólks var farin í gær. Yfir 40 manns, íbúar Höfða og dagdeildarfólk, tóku þátt í ferðinni ásamt nokkrum starfsmönnum. Lagt var af stað kl. 13 og ekið til Stykkishólms með viðkomu við Gerðuberg. Eftir skoðunarferð um Stykkishólm var haldið á hótelið þar sem boðið var upp á kaffi og glæsilegt hlaðborð af meðlæti. Að því loknu var svo ekið heim með viðkomu við Helgafell og í Borgarnesi og komið heim að Höfða upp úr kl. 19.

Hópurinn fékk frábært ferðaveður, logn, sólarlaust og 17 stiga hita. Farið var með nýrri Sæmundarrútu sem tekur hjólastóla, en undanfarin sumur hefur hjólastólafólk þurft að vera í sér bifreið. Er auðvitað skemmtilegra að allir geti verið í sömu rútu. Leiðsögumaður í þessari ferð var Björn Ingi Finsen og var leiðsögn hans fróðleg og skemmtileg að vanda.

Almenn ánægja var með þessa ferð sem tókst í alla staði mjög vel.

Í dag hófust Írskir dagar á Akranesi og stendur hátíðin í 3 daga. Íbúar Höfða og dagdeildarfólk héldu upp á þetta með útiskemmtun um miðjan daginn. Boðið var upp á léttar veitingar og Jón Heiðar spilaði á harmonikku.

Þessi uppákoma tókst í alla staði vel, enda besta veður ársins – logn og 20 stiga hiti.

Í dag heimsóttu Höfða góðir gestir frá Færeyjum í fylgd Gísla S.Einarssonar bæjarstjóra. Hér voru á ferðinni Heðin Mortensen borgarstjóri í Tórshavn ásamt borgarfulltrúum og mökum.

Gestirnir litu inn í nokkrar íbúðir og komu við í mötuneytinu þar sem íbúar voru í kaffi. Þar var þeim vel tekið og margir vildu spjalla við þá um ættingja sína í Færeyjum. Áberandi var hvað íbúar Höfða tóku þessum gestum vel og hvað þeim var hlýtt til Færeyinga.

Að lokum drukku svo gestirnir kaffi með framkvæmdastjóra og forstöðukonu þar sem þeim var kynnt starfsemi Höfða. Spurðu þeir margs og sýndu starfseminni mikinn áhuga.

Í dag heimsóttu Höfða góðir gestir frá dvalarheimilil aldraðra í Vancouver, Höfn Icelandic Harbour, þeir Norman Eyford stjórnarformaður og Erlendur Oli Leifsson stjórnarmaður.

Með þeim í för voru tveir Skagamenn, feðgarnir Sigurbjörn Björnsson og Ómar Sigurbjörnsson, en Ómar hefur stundað háskólanám í Vancouver.

Gestirnir frá Vancouver skoðuðu Höfða hátt og lágt, litu inn í íbúðir og spjölluðu við íbúana, kynntu sér starfsemi heimilisins og ræddu við starfsmenn. Þeir létu í ljós mikla hrifningu af Höfða og aðbúnaði öllum á heimilinu.

Norman Eyford færði Höfða að gjöf vandaða tösku, merkta Höfn Icelandic Harbour og Höfði gaf þeim hina landsþekktu grjónapoka sem hér eru framleiddir.