Grundartangakórinn hélt tónleika á Höfða 1.maí. Stjórnandi kórsins er Atli Guðlaugsson og einsöngvarar Bjarni Atlason og Guðlaugur Atlason. Undirleik annaðist Flosi Einarsson.

Söngurinn gerði stormandi lukku hjá Höfðafólki sem fjölmennti og skemmti sér konunglega.

Í dag var fræðsludagur starfsmanna Höfða frá kl. 12,30-16,00. Magna Fríður Birnir hjúkrunarforstjóri á heilsustofnun í Hveragerði ræddi um streitu, slökun og eflingu sjálfsímyndar og Laura Scheving Thorsteinsson hjúkrunarfræðingur hjá Landlæknisembættinu ræddi um hamingju í starfi.

Þessi fræðsla tókst mjög vel og báðir fyrirlesarar settu mál sitt fram á skýran hátt og jafnframt skemmtilega og var mikið hlegið, en um 50 starfsmenn tóku þátt í þessum fræðsludegi.

Í gær, á annan páskadag, var hátíðarguðsþjónusta í Höfðasalnum. Sr. Eðvarð Ingólfsson prédikaði og Ragnheiður Guðmundsdóttir djákni á Höfða þjónaði fyrir altari. Kór Akraneskirkju söng undir stjórn Sveins Arnars Sæmundssonar.

Guðsþjónustan var mjög vel sótt.  Þetta var fyrsta guðsþjónustan í nýja salnum og nóg pláss fyrir alla, en oft var ansi þröngt í gamla salnum við slíkar athafnir.

Kór Akraneskirkju hélt tónleika í nýja Höfðasalnum s.l. laugardag undir stjórn Sveins Arnar Sæmundssonar. Tónleikarnir voru mjög vel sóttir og undirtektir góðar.

Að sögn kórstjóra og söngfólks er mjög góður hljómburður í nýja salnum.

Hin árlega Höfðagleði var haldin s.l. föstudagskvöld. Á Höfðagleði mæta íbúar, starfsmenn, fyrrverandi starfsmenn sem hafa hætt vegna aldurs og stjórn Höfða.

Boðið var upp á glæsilega þriggja rétta veislumáltíð sem Haukur kokkur og hans fólk í eldhúsinu reiddi fram.

Guðjón setti skemmtunina og bauð fólk velkomið í nýja Höfðasalinn sem var tekinn í notkun þetta kvöld. Veislustjóri var Anton Ottesen og kryddaði hann kynningu atriða með smellnum gamansögum. Adda fór með gamanmál. Ræðumaður kvöldsins var Halldór Blöndal. Loks söng bæjarlistamaðurinn Hanna Þóra Guðbrandsdóttir nokkur lög við undirleik Sveins Arnars Sæmundssonar.

Dregið var í happdrætti þar sem íbúar og starfsmenn fengu góða vinninga í boði Einars Ólafssonar kaupmanns og Kjarnafæðis.

Að lokum var dansað til miðnættis við undirleik Jóns Heiðars Magnússonar.

Um 170 manns tóku þátt í Höfðagleðinni sem tókst vel að vanda.

Vegna framkvæmda við stækkun þjónusturýma hefur samkomusalur Höfða verið lokaður frá því í maí í fyrra.  Hefur því allt félagsstarf farið fram á göngum hússins s.l. 10 mánuði.

Nú er framkvæmdum við nýja samkomusalinn lokið og er hann hinn glæsilegasti og mun stærri en gamli salurinn. Salurinn verður tekinn í notkun í kvöld þegar hin árlega Höfðagleði verður haldin.

Höfði hefur eignast nýtt málverk Bjarna Þórs Bjarnasonar og prýðir það salinn. Verkið nefnir hann SAGAN ÖLL og er af helstu viðburðum og atvinnulífi Hvalfjarðar í gegnum tíðina. Yfir öllu vakir svo Hallgrímur Pétursson með passíusálmana í hendi.

Á aðfangadag var Ragnheiður Guðmundsdóttir djákni með helgistund. Þar sungu barnabörn hennar jólasálma við undirleik sonar Ragnheiðar.

Á annan jóladag var hátíðarguðsþjónusta. Sr. Eðvarð Ingólfsson predikaði. Kór Akraneskirkju söng við undirleik Sveins Arnars Sæmundssonar stjórnanda kórsins.

Í morgun var helgistund djákna. Þar söng kór Saurbæjarprestakalls. Undirleik annaðist kórstjórinn Örn Magnússon.

Allar þessar samkomur voru vel sóttar og sköpuðu hátíðarstemningu á Höfða.

Feðginin Ingibjörg Aldís og Ólafur Beinteinn Ólafsson héldu tónleika á Höfða í dag. Þau sungu þjóðlög og jólalög og enduðu á Heims um ból og tóku síðan aukalag Ó helga nótt.

Ólafur sló á létta strengi og stýrði hópsöng. Íbúar Höfða tóku undir sönginn af  krafti og höfðu mikla ánægju af þessum frábæru tónleikum.

Í dag heimsóttu Höfða tveir nemendur Grundaskóla, Salóme Jónsdóttir og Sverrir Mar Smárason, og færði heimilinu fallega jólaskreytingu gerða af nemendum skólans.

Nemendur Grundaskóla hafa lengi haft þann góða sið að heimsækja Höfða fyrir jólin og færa heimilinu  gjafir gerðar af nemendum. Þessir fallegu munir prýða Höfða.

Margrét A.Guðmundsdóttir húsmóðir á Höfða veitti gjöfinni viðtöku og þakkaði þessa góðu gjöf og þann hlýhug sem henni fylgir.

Kór Orkuveitu Reykjavíkur heimsótti Höfða í morgun og söng fyrir íbúa hússins við góðar undirtektir.

Stjórnandi kórsins er Árni Heiðar Karlsson.