Næstu daga verður til sýnis á Höfða verðlaunahúsið í piparkökuhúsakeppni Kötlu. Húsið er gert af Valdísi Einarsdóttur sem sigraði í þessari keppni í níunda skipti. Að þess sinni er verðlaunahúsið líkan af húsi sem Thor Jensen byggði við Fríkirkjuveg 11 í upphafi síðustu aldar, en þetta hús setur mikinn svip á umhverfi sitt.
Þess má geta að móðir Valdísar, Sigríður Jónsdóttir, er íbúi á Höfða.
Í morgun var Ragnheiður Guðmundsdóttir djákni með helgistund í samkomusal Höfða. Með henni var kór Saurbæjarkirkju á Hvalfjarðarströnd sem söng nokkra sálma við undirleik Arnar Magnússonar organista.
Mikil aðsókn var að þessari helgistund og hátíðleg stemning í salnum.
Í gær var haldið jólaball fyrir börn og barnabörn íbúa og starfsmanna Höfða. Jólasveinarnir Stekkjastaur og Hurðaskellir komu í heimsókn og dansað var í kringum jólatréð. Börnin fengu gos og poka með sælgæti og foreldrarnir kaffi og smákökur.
Börn og foreldrar troðfylltu samkomusal Höfða og skemmtu sér vel.
Ragnheiður Guðmundsdóttir djákni var með helgistund í samkomusal á aðfangadagsmorgun. Með henni mættu 8 barnabörn hennar sem sungu nokkra sálma við góðar undirtektir.
Á annan í jólum var hátíðarmessa. Sr. Eðvarð Ingólfsson prédikaði og kór Akraneskirkju söng við undirleik Sveins Arnars Sæmundssonar organista. Þórgunnur Stefánsdóttir söng einsöng.
Báðar þessar athafnir voru mjög vel sóttar og sköpuðu góða jólastemningu á Höfða.
Í morgun komu tveir nemendur Grundaskóla, Adda Malín Vilhjálmsdóttir og Nína Alexandersdóttir, og færðu heimilinu fallegan handunninn kertastjaka sem unninn var af nemendum skólans.
Nemendur Grundaskóla hafa þann góða sið að heimsækja Höfða fyrir hver jól og færa heimilinu hluti gerða af nemendum. Þessir fallegu munir prýða Höfða.
Sigurbjörg Halldórsdóttir hjúkrunarforstjóri veitti gjöfinni viðtöku og þakkaði stúlkunum fyrir þessa góðu gjöf og þann hlýhug sem henni fylgir.
Kvennakórinn Ymur hélt söngskemmtun í samkomusal Höfða s.l. laugardag. Stjórnandi kórsins er Sigríður Elliðadóttir.
Góð aðsókn var að tónleikunum og þökkuðu íbúar Höfða þessum góðu gestum fyrir sönginn með öflugu lófataki.
Góðir gestir heimsóttu Höfða í morgun. 4 ára börn af Leikskólanum Garðaseli komu ásamt fóstrum og sungu nokkur jólalög í anddyrinu við góðar undirtektir.
Grundartangakórinn hélt tónleika á Höfða í gær. Stjórnandi kórsins er Atli Guðlaugsson og einsöngvarar þeir Smári Vífilsson og Bjarni Atlason. Þá söng Tindatríóið sem er skipað þeim feðgum Atla Guðlaugssyni, Bjarna Atlasyni og Guðlaugi Atlasyni.
Íbúar Höfða troðfylltu samkomusalinn og gerði söngurinn mikla lukku að vanda, en Grundartangakórinn heimsækir Höfða reglulega og er í miklu uppáhaldi hjá Höfðafólki.
Aðventuhátíð var haldin á Höfða í gær. Sr. Eðvarð Ingólfsson stjórnaði samkomunni. Ræðumaður var Sigríður Indriðadóttir. Sr. Eðvarð fór með gamanmál. Stúlknakór Akraness og félagar úr Kór Akraneskirkju sungu. Að lokum sameinuðust allir í bæn.
Hátíðin tókst í alla staði mjög vel og aðsókn var meiri en nokkru sinni áður.
Árshátíð starfsmanna Höfða var haldin að Miðgarði s.l. laugardagskvöld. Mæting var ágæt og kvöldið vel heppnað, enda skemmtunin vel undirbúin af árshátíðarnefnd sem var skipuð þeim Sigurbjörgu Ragnarsdóttur, Hjördísi Guðmundsdóttur og Elísabetu Ragnarsdóttur.
Veislustjóri var Björn Gunnarsson læknir. Rakel Pálsdóttir söng og hljómsveitin Feðgarnir lék fyrir dansi og má segja að dansgólfið hafi verið fullt þar til árshátíðinni lauk á þriðja tímanum.
Árshátíðin tókst í alla staði mjög vel og var almenn ánægja meðal þátttakenda. Þrír starfsmenn, Helga Atladóttir, Guðrún Sigurbjörnsdóttir og Svandís Stefánsdóttir, fengu viðurkenninguna “árshátíðartak”, litla styttu í stíl við Grettistakið sem er tákn Höfða. Viðurkenningunni fylgdi sú kvöð að viðkomandi skipa næstu árshátíðarnefnd.
