Níu konur úr Soroptimistaklúbbi Akraness heimsóttu Höfða í dag og afhentu heimilinu að gjöf 2 rafknúna hægindastóla (lyftistóla). Þetta eru afskaplega þægilegir stólar sem hægt er að stilla á ýmsa vegu og munu nýtast vel hér á Höfða.

Ingibjörg Sigurðardóttir ávarpaði íbúa og starfsmenn. Hún kynnti klúbbinn og markmið soroptimista sem er að vinna að bættri stöðu kvenna, gera háar kröfur til siðgæðis, vinna að mannréttindum, jafnrétti, framförum og friði.

Soroptimistar skulu beita sér fyrir að veita þjónustu í heimabyggð, heimalandi og á alþjóðavettvangi. Hún gerði grein fyrir ýmsum þörfum verkefnum sem klúbburinn hefur staðið að, bæði hér heima og erlendis.

Þá sagði hún að þessi gjöf til Höfða væri í tilefni af 25 ára afmæli klúbbsins.

Ása Helgadóttir afhenti síðan framkvæmdastjóra stólana með gjafabréfi. Guðjón Guðmundsson þakkaði konunum þessa höfðinglegu gjöf og bauð þeim til kaffisamsætis með íbúum og starfsmönnum.

Fólk á öllum aldri sækir þær listsýningar sem nú standa yfir á Höfða.

Í dag kom Indíánahópur Leikskólans Garðasels í fylgd Guðlaugar Sverrisdóttur leikskólakennara og skoðaði listaverkin. Ræddu þau opinskátt um það sem fyrir augun bar og höfðu gaman af að stúdera listina.

Í dag heimsóttu nemendur 8.bekkjar BJ í Grundaskóla Höfða í fylgd kennara síns Borghildar Jósúadóttur.

Erindið var að skoða þær listsýningar sem nú standa yfir á Höfða, en faðir eins nemandans er einn þeirra listamanna sem sýna verk sín hér á Vökudögum.

Unga fólkið hafði gaman af að skoða listaverkin og heilsa upp á þá íbúa Höfða sem urðu á vegi þeirra.

Í dag var opið hús á Höfða frá kl. 13-16 í tilefni af 30 ára afmæli Höfða. Mjög margir litu inn. Boðið var upp á skipulagðar skoðunarferðir um húsið í fylgd Helgu Atladóttur hjúkrunarforstjóra.

Hinn árlegi Höfðabasar var svo opinn frá kl. 14-16. Gífurleg aðsókn var að basarnum og mikil sala á þeim fallegu vörum sem þar voru í boði.

Þá voru hjónin Rakel Jónsdóttir og Björn Gústafsson, íbúar á Höfða, með sölubás þar sem þau seldu fallega muni og skartgripi úr íslensku grjóti sem þau hafa gert á liðnum árum. Mikil sala var á þessu fallega handverki.

Boðið var upp á kaffi í samkomusal og þáðu margir sopann, ekki síst þeir sem áttu maka á basarnum.

Í dag heimsótti Gunnvör Balle konsúll Færeyja á Íslandi Höfða. Með henni för voru Gunnar Sigurðsson settur bæjarstjóri, Jón Pálmi Pálsson bæjarritari og Helga Gunnarsdóttir sviðsstjóri.

Gestirnir skoðuðu heimilið og snæddu síðan hádegisverð með framkvæmdastjóra, húsmóður og hjúkrunarforstjóra.

Jón Bjarnason og Katrín Jakobsdóttir þingmenn Vinstri hreyfingarinnar græns framboðs heimsóttu Höfða í dag og spjölluðu við íbúa og starfsmenn, en nú standa yfir kjördæmadagar á Alþingi þar sem þingmenn fara um kjördæmin og hitta fólk að máli.

6 félagsráðgjafar af Landakoti heimsóttu Höfða í dag. Margrét A.Guðmundsdóttir kynnti þeim starfsemi heimilisins og sýndi þeim helstu starfsstöðvar, svo og íbúðir nokkurra heimilismanna.

Í dag og í gær hafa íbúar Höfða staðið í sláturgerð með aðstoð nokkurra starfsmanna. Tekin voru 100 slátur. Fólk var einbeitt við sláturgerðina og handtökin fagmannleg. Augljóst var að þeir sem að sláturgerðinni stóðu hafa tekið slátur allan sinn búskap.

Létt var yfir mannskapnum og augljóst að allir höfðu af þessu gaman. Fyrsta sláturmáltíðin verður framreidd á morgun, en slátrið er sívinsæll matur hjá íbúum og starfsfólki Höfða.

Yfirblandari í sláturgerðinni var sem endranær Svandís Stefánsdóttir.

Aðalfundur Dvalarheimilisins Höfða var haldinn í gær.

Benedikt Jónmundsson formaður stjórnar Höfða flutti ítarlega skýrslu stjórnar og Guðjón Guðmundsson framkvæmdastjóri skýrði ársreikning Höfða og Gjafasjóðs Höfða.

Gísli S.Einarsson bæjarstjóri flutti kveðjur bæjarstjórnar og lýsti ánægju með starfsemi Höfða og samstarf við stjórn og starfsfólk.

Fundarstjóri var Rún Halldórsdóttir og fundarritari Karen Jónsdóttir.

Í gær hélt hjúkrunarforstjóri deildarfund starfsfólks í aðhlynningu. Þar voru kynntar fyrirhugaðar framkvæmdir við stækkun þjónusturýmis, farið yfir almenn atriði, hjúkrunarskráningu, vinnuskýrslur og fleira.

Mjög vel var mætt á fundinn sem tókst í alla staði vel.