Í gær var jólaball á Höfða fyrir börn og barnabörn íbúa og starfsmanna. Bjórbandið lék jólalögin og Andrea Guðjónsdóttir söng. Tveir jólasveinar komu í heimsókn og útdeildu gjöfum til barnanna. Ballið var mjög vel sótt bæði af börnum og aðstandendum og skemmtu sér allir vel. Að balli loknu þáðu gestir veitingar í boði Höfða.
Margir góðir gestir heimsóttu Höfða í síðustu viku. Á þriðjudagsmorgni komu börn úr Leikskólanum Vallarseli og fluttu helgileik. Var gaman að sjá hvað börnin lögðu sig fram og hvað flutningur þeirra var góður. Gerði sýningin mikla lukku hjá íbúum Höfða. Að sýningu lokinni var flytjendum boðið upp á Svala sem rann ljúflega niður.
Síðdegis á þriðjudag kom svo Grundartangakórinn með sína árlegu jólatónleika, en þessi góði kór hefur heimsótt Höfða ár hvert í aldarfjórðung. Stjórnandi kórsins er Atli Guðlaugsson.
Smári Vífilsson og Guðlaugur Atlason sungu einsöng. Grundartangakórinn er alltaf jafn vinsæll hjá íbúum Höfða sem njóta þess að hlýða á þennan ágæta karlakór.
Á miðvikudag kom svo kór Orkuveitu Reykjavíkur söng nokkur lög við góðar undirtektir.
Öllum þeim fjölmörgu listamönnum sem hafa heimsótt Höfða á árinu eru færðar bestu þakkir.
Margir góðir gestir hafa heimsótt Höfða að undanförnu og skemmt íbúum heimilisins. Í síðustu viku komu tvær stúlkur úr tónlistarskólanum og léku nokkur jólalög í matsalnum á kaffitíma. Þær heita Kim Klara sem spilaði á fiðlu og Sóley Hafsteinsdóttir á flautu. Góður rómur var gerður að flutningi þeirra.
Á miðvikudag kom Óskar Pétursson, Álftagerðisbróðir, og kynnti nýjan geisladisk sinn. Óskar söng nokkur lög og sagði gamansögur við góðar undirtektir íbúa Höfða sem troðfylltu samkomusalinn.
Á föstudag komu svo Davíð Ólafsson bassi og Stefán Helgi Stefánsson tenór og sungu jólalög og önnur lög við mikla hrifningu Höfðafólks sem hyllti þá vel og lengi að skemmtun lokinni. Þess má geta að Davíð er náfrændi Jónínu Finsen íbúa á Höfða og á meðfylgjandi myndi heilsar hann upp á frænku sína.
Von er á fleiri góðum gestum í þessari viku.
Miss world keppnin verður haldin í Suður-Afríku á laugardaginn. Fulltrúi Íslands í keppninni er fegurðardrottning Íslands, Guðrún Dögg Rúnarsdóttir, en hún hefur starfað í mötuneyti Höfða síðustu tvö sumur og einnig með skóla síðustu tvo vetur.
Þátttakendur hafa verið í stífum undirbúningi s.l. 7 vikur í London, Dubai og Suður-Afríku frá því snemma á morgnana og fram á kvöld dag eftir dag.
Íbúar og starfsmenn Höfða senda Guðrúnu Dögg baráttukveðjur og óska henni góðs gengis í keppninni.
Í gær var aðventusamkoma á Höfða. Sr. Eðvarð Ingólfsson stjórnaði samkomunni.
Ræðumaður var Ingibjörg Pálmadóttir. Sr. Eðvarð fór með gamanmál. Kór Akraneskirkju söng undir stjórn Sveins Arnars Sæmundssonar.
Þá lék Baktríóið, skipaði þeim Sveini Arnari, Kristínu Sigurjónsdóttur og Baldri Ketilssyni tvö lög, annað þeirra samið af Baldri. Að lokum sameinuðust allir í bæn.
Hátíðin tókst í alla staði mjög vel og var vel sótt af íbúum Höfða og Höfðagrundar sem fylltu samkomusalinn. Eftir samkomuna var svo boðið upp á kaffi og smákökur.
Mikið fjör var á Höfða í lok síðustu viku. Á föstudaginn var ball með Bjórbandinu. Þar var mikið stuð og mikið dansað. Þetta er annað ballið með Bjórbandinu á skömmum tíma, en hljómsveitin spilar músík sem fellur íbúum Höfða vel.
Á laugardag heimsótti svo KK (Kristján Kristjánsson) Höfða og spilaði á gítar, söng og sagði gamansögur. Íbúar og starfsmenn troðfylltu samkomusalinn og höfðu mikla ánægju af heimsókn þessa góða gests. Þess má geta að tengdamóðir KK, Rannveig Hálfdánardóttir, er íbúi á Höfða.
Í gær hófst gleðivika á Höfða og stendur hún til 25.nóvember. Þema vikunnar er bleiki liturinn. Starfsmenn klæðast og punta sig með bleiku. Bleiki liturinn er auk þess hafður til skrauts víðs vegar í húsinu. Meira að segja maturinn í gær var bleikur (soðinn lax).
Í tilefni Vökudaga á Akranesi var opnuð sýning á handverki og list starfsmanna, íbúa og dagdeildarfólks á Höfða s.l. föstudag.
Við opnunina söng nýstofnaður kór starfsmanna Höfða nokkur lög undir stjórn Heiðrúnar Hámundardóttur. Gunnþórunn Valsdóttir og Bjarney Guðbjörnsdóttir léku undir á hljóðfæri.
<pMjög margir lögðu leið sína á sýninguna sem stóð alla helgina og við opnunina var troðfullt af fólki sem skoðaði það sem til sýnis var af miklum áhuga og klappaði kórnum lof í lófa fyrir góðan flutning.
Segja má að þessi sýning hafi slegið í gegn, enda fjölbreytt handverk og listmunir til sýnis sem vöktu óskipta athygli sýningargesta. Nokkrir íbúa Höfða voru með sölubása og seldu vel af handverki sínu.
Eufemia Berglind Guðnadóttir hjúkrunarfræðingur á Höfða hélt í dag fyrirlestur um heilabilun fyrir starfsfólk, íbúa og aðstandendur. Um 50 manns sóttu fyrirlesturinn.
Eufemia Berglind var með kynningu á glærum og fór yfir mismunandi kenningar um orsök og afleiðingar heilabilunar. Í máli hennar kom fram að Alsheimer sjúkrómur getur greinst í einstaklingum frá 40 ára aldri og að endurhæfing sjúklinga er mjög mikilvæg til að viðhalda sem lengst sem mestu minni, en í sjúkdómsferlinu eru einkenni oft hægfara og óljós.
Eufemia Berlind og móðir hennar, Lilja G.Pétursdóttir íbúi á Höfða, færu heimilinu að gjöf fjórar bækur um heilabilun.
Davíð Ólafsson bassi og Stefán Helgi Stefánsson tenór fluttu sönglög og dúetta á Höfða í dag. Söngur þeirra félaga vakti mjög mikla hrifningu hjá íbúm Höfða sem troðfylltu samkomusalinn. Davíð og Stefán Helgi munu væntanlega heimsækja Höfða aftur í desember.
