Í morgun heimsótti Höfða fríður flokkur fjögurra ára leikskólabarna af Akraseli. Börnin sungu jólalögin , fyrst í Höfðasal og síðan á hjúkrunardeild, við góðar undirtektir íbúa Höfða.

Að söng loknum bauð húsmóðirin á Höfða upp á djús og smákökur.

Í dag heimsóttu börn af leikskólanum Vallarseli íbúa á 3.hæð Höfða í fylgd Aðalheiðar Þrárinsdóttur leikskólakennara. Börnin skoðuðu fiskabúrið, teiknuðu, sungu og spjölluðu við íbúana.

Börnin fengu góðar móttökur og ætla að gera þetta reglulega í vetur.

Í gær var haldin aðventusamkoma á Höfða undir stjórn sr. Eðvarðs Ingólfssonar. Kór Akraneskirkju söng jólalög og sálma undir stjórn og undirleik Sveins Arnars Sæmundssonar. Fjögur ungmenni fluttu tónlistaratriði, þau Halla Margrét Jónsdóttir, Ari Jónsson, Auður Marín Adolphsdóttir og Katarína Stefánsdóttir. Ræðumaður var Ari Jóhannesson læknir. Þá stjórnaði sr. Eðvarð spurningaleik á léttum nótum milli íbúa og starfsmanna Höfða. Liðin skipuðu Jóhanna Ólafsdóttir og Kristján Ásgeirsson íbúar og Adda og Guðjón starfsmenn. Dómari var Indriði Valdimarsson og úrskurðaði hann að liðin hefðu skilið jöfn. Að lokum flutti sr.Eðvarð bæn og blessun.

Höfðasalurinn var troðfullur við þessa athöfn sem var bæði skemmtileg og hátíðleg. Að lokum þakkaði Guðjón öllum sem komið hefðu fram fyrir að flytja jólastemninguna inn á Höfða og Adda bauð viðstöddum í kaffi og smákökur.

Í gær var létt og hvetjandi dagskrá með fjölmiðlakonunni Sigríði Arnardóttur (Sirrý) í Höfðasal. Fyrri hluti dagskrárinnar var fyrir íbúa og starfsmenn og síðari hlutinn eingöngu fyrir starfsmenn. Dagskráin sem Sirrý nefnir Laðaðu til þín það góða gengur út á samkiptafærni, hamingju og sjálfstraust.

Um 30 íbúar og 40 starfsmenn tóku þátt í dagskránni og fóru allir ánægðir heim.

Í morgun var laufabrauðsskurður á Höfða og tóku allmargir íbúar Höfða þátt í skurðinum. Glöggt mátti sjá að flestir voru þaulvanir þessari list. Svandís Stefánsdóttir og Margrét A.Guðmundsdóttir undirbjuggu og stjórnuðu verkinu. Létt var yfir fólki við skurðinn.

S.l. sunnudag héldu starfsmenn Höfða jólamarkað. Þar var selt bakkelsi, sultur, hannyrðavörur og föndurvörur gerðar af starfsmönnum, en undanfarnar vikur hafa verið nokkur föndurkvöld á Höfða. Þá var Ólöf Hjartardóttir íbúi á Höfða með sölubás þar sem hún seldi jólakort og skartgripi sem hún hefur framleitt.

Boðið var upp á vöfflukaffi og þar komu tveir velunnarar Höfða og léku á hljóðfæri fyrir kaffigesti, þær Gyða Bergþórsdóttir á píanó og Fanney Reynisdóttir á harmonikku.

3- 400 manns sóttu þennan jólamarkað sem tókst í alla staði mjög vel.

Í dag hélt kór Grundaskóla söngskemmtun í Höfðasal. Íbúar Höfða og dagdeildarfólk fjölmenntu og nutu góðs söngs. Stjórnandi kórsins er Valgerður Jónsdóttir.

Hin árlega kvöldvaka þar sem starfsmenn Höfða bjóða íbúum upp á skemmtiatriði og veitingar var haldin í kvöld. Borð svignuðu undan girnilegum kræsingum sem starfsmenn komu með að heiman og boðið var upp á fjölbreytta dagskrá. Fyrst sungu og léku tvær ungar stúlkur nokkur lög, síðan komu 15 félagar úr Kór Akraneskirkju og fluttu þjóðlega sýningu um djáknann á Myrká og Miklabæjar Sólveigu með myndum og söng undir stjórn Sveins Arnars Sæmundssonar bæjarlistamanns.  Þá kvað Sigurbjörg Halldórsdóttir rímur og loks var tískusýning frá Litlu búðinni þar sem skemmtinefndin og nokkrir aðrir starfsmenn Höfða voru í hlutverki tískusýningarfólks.

Mikil ánægja var með þessa kvöldvöku sem heppnaðist mjög vel. Skemmtinefndina skipuðu þær Margrét Reimarsdóttir, Ólöf Elva Smáradóttir, Sigrún Jóhannesdóttir, Stína Ósk Gísladóttir og Svandís Stefánsdóttir.