Í dag og í gær hafa íbúar Höfða staðið í sláturgerð með aðstoð nokkurra starfsmanna. Tekin voru 100 slátur. Fólk var einbeitt við sláturgerðina og handtökin fagmannleg. Augljóst var að þeir sem að sláturgerðinni stóðu hafa tekið slátur allan sinn búskap.

Létt var yfir mannskapnum og augljóst að allir höfðu af þessu gaman. Fyrsta sláturmáltíðin verður framreidd á morgun, en slátrið er sívinsæll matur hjá íbúum og starfsfólki Höfða.

Yfirblandari í sláturgerðinni var sem endranær Svandís Stefánsdóttir.

Aðalfundur Dvalarheimilisins Höfða var haldinn í gær.

Benedikt Jónmundsson formaður stjórnar Höfða flutti ítarlega skýrslu stjórnar og Guðjón Guðmundsson framkvæmdastjóri skýrði ársreikning Höfða og Gjafasjóðs Höfða.

Gísli S.Einarsson bæjarstjóri flutti kveðjur bæjarstjórnar og lýsti ánægju með starfsemi Höfða og samstarf við stjórn og starfsfólk.

Fundarstjóri var Rún Halldórsdóttir og fundarritari Karen Jónsdóttir.

Í gær hélt hjúkrunarforstjóri deildarfund starfsfólks í aðhlynningu. Þar voru kynntar fyrirhugaðar framkvæmdir við stækkun þjónusturýmis, farið yfir almenn atriði, hjúkrunarskráningu, vinnuskýrslur og fleira.

Mjög vel var mætt á fundinn sem tókst í alla staði vel.

Í gær heimsóttu Höfða sjúkraliðar í sérnámi í öldrun. Helga Atladóttir hjúkrunarforstjóri tók á móti þeim og sýndi þeim alla starfsemi í húsinu. Þá litu þær inn hjá Guðrúnu Bjarnadóttur íbúa á Höfða sem spjallaði við þær um daginn og veginn og sýndi þeim sína fallegu handavinnu.

Þessir góðu gestir voru mjög hrifnir af öllum aðbúnaði og heimilinu almennt og fannst koma góður andi þegar þær gengu inn á heimilið.

Þær nema fræði sín í Fjölbrautaskólanum í Ármúla og var Guðrún Hildur Ragnarsdóttir kennari í för með þeim. Tveir þessara nema hafa verið sjúkraliðar á Höfða um langt árabil, þær Guðrún Björnsdóttir og Rakel Gísladóttir.

Í morgun heimsóttu Höfða 37 sænskumælandi sveitarstjórnarmenn frá Finnlandi í fylgd Gísla S.Einarssonar bæjarstjóra sem sagði þeim frá starfsemi Höfða og sýndi þeim heimilið í fylgd Sigurbjargar Ragnarsdóttur og Elísabetar Ragnarsdóttur.

Frábær árangur íslenska handboltalandsliðsins á Olympíuleikunum í Kína er helsta umræðuefni fólksins á Höfða og allir sem vettlingi geta valdið fylgjast með leikum liðsins í sjónvarpinu.

Á myndinni sjást þær Guðrún Ólafsdóttir, Guðrún Adolfsdóttir og Lára Arnfinnsdóttir gera hlé á handavinnunni til að fylgjast með glæsilegum sigri okkar manna gegn Pólverjum.

Samstarfsnefnd um málefni aldraðra ásamt fulltrúum Félags- og tryggingamálaráðuneytis heimsótti Höfða í dag.

Þetta voru nefndarmennirnir Ágúst Ólafur Ágústsson formaður, Ásta Möller, Margrét Margeirsdóttir, Ragnhildur Eggertsdóttir, Dögg Pálsdóttir Helgi K.Hjálmsson og Bernharður Guðmundsson ásamt starfsmönnum ráðuneytisins þeim Vilborgu Ingólfsdóttur og Láru Björnsdóttur.

Guðjón Guðmundsson framkvæmdastjóri, Helga Atladóttir hjúkrunarforstjóri, Margrét A.Guðmundsdóttir húsmóðir og Benedikt Jónmundsson formaður stjórnar Höfða tóku á móti þessum góðu gestum, kynntu þeim starfsemi Höfða og sýndu þeim nokkrar íbúðir. Þá voru þeim kynntar áætlanir um stækkun þjónusturýmis heimilisins, svo og framtíðarhugmyndir stjórnenda Höfða.

Gestirnir snæddu hádegisverð með heimamönnum og héldu síðan áfram ferð sinni um Vesturland.

Í gær héldu feðginin Ingibjörg Aldís, sópransöngkona og Ólafur B.Ólafsson tónleika á Höfða. Ingibjörg Aldís söng innlend og erlend lög við undirleik föður síns og Ólafur lék einnig á harmonikku og stjórnaði hópsöng.

Samkomusalurinn var fullur út úr dyrum og íbúar Höfða skemmtu sér konunglega, enda fóru þau feðginin á kostum í flutningi sínum.

Ólafur minntist þess að þau feðginin hefðu áður skemmt á Höfða og liðið hér afskaplega vel. Í tilefni af því hefði hann sett saman svohljóðandi Höfðabrag:

Á dvalarheimilinu Höfða

glaðar hef ég sálir séð.

Menn og svannar syngja með.

Þakklátur ég staðinn kveð.

Svona var það líka síðast

saman hér við mættum mörg.

Vorum við þá ekki örg

Ólafur og Ingibjörg.

Starfsfólkið á þakkir skilið

stendur gjarnan heiðursvörð,

er heim við sækjum Höfðahjörð

hina bestu hér á jörð.

Guðjón framkvæmdastjóri þakkaði þeim feðginum komuna og frábæra skemmtun og bað þau að koma sem fyrst aftur.

Starfsmenn Höfða hafa notað góða veðrið í sumar til að bregða undir sig betri fætinum. Föstudaginn 30.maí fór tæplega 40 manna hópur í heimsókn á Hrafnistu og fékk þar frábærar móttökur hjá Skagamanninum Pétri Magnússyni framkvæmdastjóra og hans fólki.

Frá Hrafnistu var haldið í Bláa lónið þar sem flestir busluðu í lóninu meðan aðrir slöppuðu af í notalegum veitingasalnum.

Loks var svo snæddur kvöldverður í Salthúsinu í Grindavík og stiginn þar dans á sjómannaballi þegar leið á kvöldið.

14.júní fór svo 12 manna hópur í gönguferð um Síldarmannagötur. Eftir 6 tíma labb var svo haldið í sumarbústað Guðrúnar fótaaðgerðafræðings í Skorradal þar sem slappað var af í heita pottinum og snæddur ljúffengur grillmatur.

Þessar ferðir voru báðar mjög vel heppnaðar og komu allir ánægðir heim.

Hin árlega sumarferð Höfðafólks var farin s.l. föstudag.

Rúmlega 40 manns, íbúar Höfða, dagvistarfólk og íbúar Höfðagrundarhúsanna tóku þátt í ferðinni ásamt nokkrum starfsmönnum. Lagt var af stað kl. 13 og ekið í átt til Reykjavíkur þar sem nýjustu hverfi borgarinnar voru skoðuð.

Síðan var ekið að Hellisheiðarvirkjun þar sem starfsmenn Orkuveitu Reykjavíkur sögðu frá virkjuninni og buðu síðan upp á kaffi og meðlæti. Að því loknu var svo ekið fyrir Ingólfsfjall og heim um Grafning vestan við Þingvallavatn. Heim var svo komið kl. 18.

Hópurinn fékk frábært ferðaveður, logn, sólarlaust og 14 stiga hita. Leiðsögumaður í þessari ferð var Björn Ingi Finsen og var leiðsögn hans að vanda frábærlega fróðleg og skemmtileg.

Almenn ánægja var með þessa ferð sem tókst í alla staði mjög vel.