Þingflokkur og framkvæmdastjóri Frjálslynda flokksins heimsótti Höfða s.l. föstudag. Gestirnir skoðuðu heimilið í fylgd Margrétar A.Guðmundsdóttur húsmóður á Höfða og ræddu við íbúa og starfsmenn.

Sjúkravinir Höfða byrjuðu síðastliðið fimmtudagskvöld að spila með íbúum Höfða og sáu um veitingar. Áframhald verður á því seinasta fimmtudag í hverjum mánuði. Íbúar og starfsfólk Höfða þakkar góðar gjörðir.

Þrír nýir íbúar fluttu á Höfða um síðustu helgi; hjónin Hallveig Eiríksdóttir og Sveinn Jónsson í íbúð 214 og Sigrún Halldórsdóttir í íbúð 265.

Þau eru boðin velkomin á Höfða.

Fyrsta “Opna hús” vetrarins var á Höfða í dag. Aðsókn var sæmileg og spilað á 9 borðum. Næst verður “Opið hús” þriðjudaginn 4.október og síðan fyrsta og þriðja þriðjudag í hverjum mánuði.

Nýlega hófust æfingar í boccia á Höfða. Mikill áhugi er fyrir íþróttinni og allt að 40 íbúar Höfða mæta reglulega í boccia tíma. Ingibjörg Ólafsdóttir iðjuþjálfi stjórnar æfingunum ásamt aðstoðarmanni sínum Maríu Ásmundsdóttur.

Oddný Vestmann starfsmaður heilbrigðis- og tryggingamálaráðuneytisins heimsótti Höfða 15.september og kynnti sér starfsemina. Sigurbjörg Ragnarsdóttir tók á móti Oddnýju, en þær eiga mikil og góð samskipti vegna vistunarmála.

Undanfarin ár hefur Höfði útbúið matarbakka fyrir eldri borgara á starfssvæði heimilisins. Mikil ánægja er með þessa þjónustu og í hverjum mánuði eru sendir út milli sjö og átta hundruð bakkar. Fjölskyldusvið Akraneskaupstaðar annast heimakstur og innheimtu matarins. Sólveig Reynisdóttir sviðsstjóri fjölskyldusviðs og Sigrún Gísladóttir öldrunarfulltrúi heimsóttu Höfða 15.september til að ræða ýmis samskiptamál, en samskipti Höfða og bæjarins eru margþætt og samstarfið í alla staði ágætt. Þær létu í ljós mikla ánægju með samskiptin við Bjarna Þór Ólafsson bryta og starfslið hans, bæði gæði matarins og frábæra þjónustu.

Þann 14.september undirrituðu Halldóra Jónsdóttir bæjarbókavörður og Guðjón Guðmundsson framkvæmdastjóri Höfða samning um bókasafnsþjónustu á Höfða, en bókasafni heimilisins var nýlega lokað og húsnæði þess tekið undir iðjuþjálfun. Samkvæmt samningnum mun starfsfólk bókasafnsins annast þjónustu við íbúa Höfða annan hvern miðvikudag. Reynist þörf fyrir aukna þjónustu verður um það samið sérstaklega.

Tveir fulltrúar Símenntunarmiðstöðvarinnar á Vesturlandi, Inga Sigurðardóttir og Inga Dóra Halldórsdóttir, heimsóttu Höfða 12. september og kynntu starfsmönnum þau námskeið sem boðið verður upp á í vetur. Var þeim vel tekið og margir starfsmenn lýstu áhuga á þátttöku í hinum ýmsu námskeiðum.