Kaffihúsakvöld

Kaffihúsakvöld var haldið á Höfði í gær frá kl. 20-22. Aðsókn var mjög góð og létt yfir fólki.

Ingibjörg, María og Adda afhentu verðlaun fyrir Boccia mótið. Guðjón þakkaði þeim fyrir undirbúning og framkvæmd mótsins sem tókst í alla staði mjög vel.

Fiðlusveit tónlistarskólans lék undirstjórn Ragnars Skúlasonar. Mikil ánægja var með þetta skemmtiatriði. Guðjón og Adda fóru með kveðskap og gamanmál og Einar Þóroddsson fór með kveðskap sem orðið hafði til í skógræktarferð í hans sveit.

Þetta kaffihúsakvöld tókst í alla staði mjög vel.

Undanúrslit og úrslit í Bocciamóti Höfða

Undanúrslit og úrslit voru í dag.
Fjögur efstu liðin voru:

FOLAR: Valgerður, Bjarney og Skúli K.
NAGLAR: Diddi, Halla, Sjöfn.
Mánar: Gunnar, Sigrún H., Einar.
ERNIR: Bára, Siggi B, Hákon.

Keppnin var æsispennandi og fóru leikar sem hér segir.
FOLAR: 2 – MÁNAR: 7
NAGLAR: 8 – ERNIR: 3

Úrslit:

MÁNAR: 1 – NAGLAR: 12
ERNIR: 3 – FOLAR: 6

NAGLAR urðu því sigurvegarar og röð 4ja efstu liða sem hér segir:
1.)NAGLAR
2.)MÁNAR
3.)FOLAR
4.)ERNIR

Verðlaunaafhending verður á kaffihúsakvöldi í kvöld.

Forysta St.Rv. í heimsókn

Um áramótin sameinaðist STAK Starfsmannafélagi Reykjavíkur (St.Rv.). Á Höfða starfa flestir STAK félagar, alls 59 manns.

Formaður St.Rv. Garðar Hilmarsson og varaformaður Jakobína Þórðardóttir, heimsóttu Höfða í gær og kynntu sér starfsemi heimilisins. Með þeim í för var Valdimar Þorvaldsson, sem verið hefur formaður STAK síðustu árin.

Gestirnir spjölluðu við starfsmenn í hinum ýmsu deildum Höfða og ræddu við framkvæmdastjóra. Emilía Petrea Árnadóttir tók á móti gestunum, en hún hefur átt sæti í stjórn Stak undanfarin ár.

Framboðskynning Samfylkingarinnar.

Í dag heimsóttu frambjóðendur Samfylkingarinnar í NV-kjördæmi Höfða og kynntu stefnumál flokksins fyrir næstu þingkosningar.

Guðbjartur Hannesson, Karl V.Matthíasson, Anna Kristín Gunnarsdóttir og Helga Vala Helgadóttir spjölluðu við íbúa og starfsmenn og kynntu sér starfsemi heimilisins.

Nýir íbúar á Höfða

Þrír nýir íbúar fluttu á Höfða í síðasta mánuði. Hjónin Ragnheiður Björnsdóttir og Skarphéðinn Árnason í íbúð 119 og Skarpheiður Gunnlaugsdóttir í íbúð 213.

Þau eru boðin velkomin á Höfða.

Kynning á skyndihjálp

Í dag var Gísli Björnsson sjúkraflutningamaður með kynningu á skyndihjálp á Höfða. Fór hann yfir ýmsa þætti skyndihjálpar og fyrstu viðbrögð við ýmsum áföllum.

Kynningin var vel sótt af starfsfólki Höfða.

Vinstri grænir í heimsókn

Steingrímur J.Sigfússon formaður Vinstri hreyfingarinnar græns framboðs og Jón Bjarnason þingmaður flokksins heimsóttu Höfða í dag. Í fylgd með þeim var Rún Halldórsdóttir bæjarfulltrúi og stjórnarmaður í Höfða.

Gestirnir ræddu við heimilisfólk og starfsmenn og kynntu sér starfsemi heimilisins.

Rausnarleg gjöf

Um þessi áramót leggst af starfsemi STAK (Starfsmannafélags Akraneskaupstaðar) og félagið verður deild í Starfsmannafélagi Reykjavíkurborgar. Við þessi tímamót ákvað stjórn STAK að færa nokkrum stofnunum á Akranesi peningagjafir til ákveðinna verkefna. M.a. voru Höfða færðar 700 þúsund krónur til að bæta aðbúnað starsfmanna og íbúa.

Við athöfn í bæjarþingsalnum í morgun afhenti Valdimar Þorvaldsson formaður STAK fulltrúum viðkomandi stofnana gjafirnar, en alls gaf STAK 5 milljónir króna.

Guðjón Guðmundsson veitti gjöfinni til Höfða viðtöku og þakkaði þessa rausnarlegu gjöf. Guðjón lýsti ánægju með að munað væri eftir starfsmönnum Höfða á þessum tímamótum, en alls störfuðu 59 félagar STAK á Höfða og væru þeir um 2/3 af starfsliði heimilisins.Guðjón sagði að samhent og öflugt starfslið væri einn helsti styrkleiki Höfða og minnti viðstadda á að Höfði væri eitt af því sem Skagamenn gætu verið stoltir af.