Í fyrradag voru veittir fjórir styrkir úr Rannsóknarsjóði Öldrunarráðs Íslands, en sjóðurinn styrkir áhugaverðar rannsóknir í öldrunarmálum.
Helga Atladóttir hjúkrunarforstjóri á Höfða hlaut 300 þúsund króna styrk vegna rannsóknar sinnar á heilsufari og færni aldraðra með einkenni heilabilunar á hjúkrunardeildum á Íslandi og gæðum þeirrar hjúkrunar sem þeir njóta. Um er að ræða meistaraverkefni Helgu en hún stundar meistaranám í hjúkrunarstjórnun við hjúkrunarfræðideild Háskóla Íslands.
Vegna framkvæmda við stækkun þjónusturýma er samkomusalur Höfða lokaður og verður því að halda samkomur á ganginum framan við salinn.
Í dag lék Jón Heiðar Magnússon á harmonikku gömlu góðu danslögin við góðar undirtektir Höfðafólks og tóku margir snúning við ljúfa tóna nikkunnar.
Í dag komu íbúar og starfsmenn saman kl. 14,25 í tilefni kvennafrídagsins og sungu og lásu ljóð. Mæting var mjög góð og mikil stemning í hópnum.
Arion banki hefur fært Höfða að gjöf 20 innrammaðar myndir, teikningar sr. Jóns M.Guðjónssonar af bæjum í nærsveitum Akraness, en þessar myndir hafa prýtt útibú bankans á Akranesi sem nú hefur verið lokað.
Myndirnar verða settar upp í nýja matsalnum sem verður tilbúinn til notkunar á fyrri hluta næsta árs.
Í gær heimsótti hinn sívinsæli Raggi Bjarna Höfða og söng gömlu góðu lögin og fór með gamanmál. Íbúar og dagdeildarfólk tóku undir sönginn og skemmtu sér konunglega. Ása Ólafsdóttir tók tvö lög með Ragga, en hún var dægurlagasöngkona á yngri árum.
Árni Múli Jónasson, nýráðinn bæjarstjóri á Akranesi, heimsótti Höfða í dag. Hann skoðaði heimilið ítarlega, ræddi við starfsmenn og íbúa og fundaði síðan með stjórnendum Höfða þar sem farið var yfir helstu áherslur í starfsemi og rekstri heimilisins. Í för með bæjarstjóra var Tómas Guðmundsson verkefnastjóri bæjarins.
Guðbjartur Hannesson ráðherra velferðarmála heimsótti Höfða í morgun og fundaði með Kristjáni Sveinssyni formanni stjórnar Höfða, Guðjóni Guðmundssyni framkvæmdastjóra og Helgu Atladóttur hjúkrunarforstjóra. Fundinn sátu einnig Árni Múli Jónasson bæjarstjóri og Guðmundur Páll Jónsson formaður bæjarráðs.
Forsvarsmenn Höfða kynntu ýmis hagsmunamál Höfða; yfirstandandi og fyrirhugaðar framkvæmdir, íbúafjölda, starfsmannahald o.fl.
Að fundi loknum heilsaði ráðherra upp á íbúa Höfða.
Kiwanisklúbburinn Þyrill á 40 ára afmæli um þessar mundir. Í tilefni af því færði klúbburinn nokkrum aðilum gjafir í samkvæmi á sjúkrahúsinu í gærkvöldi. Halldór Fr. Jónsson formaður Þyrils færði þar Höfða 3 góðar gjafir; sjúkrarúm sem hægt er að hækka og lækka, 3 vinnuborð fyrir dagdeild og þrekhjól fyrir sjúkraþjálfun. Heildarverðmæti þessara gjafa er kr. 1.135.000.
Guðjón Guðmundsson þakkaði klúbbfélögum fyrir þessar góðu gjafir og minnti á að Kiwanisklúbburinn Þyrill hefði allt frá því Höfði hóf starfsemi fyrir 32 árum fært heimilinu hverja stórgjöfina á fætur annari sem hefðu nýst vel.
Aðrir sem fengu gjafir frá Þyrli í tilefni afmælisins eru Sjúkrahús Akraness, Þjótur íþróttafélag fatlaðra og Dropinn félag sykursjúkra barna.
Framkvæmdir við stækkun þjónusturýma Höfða hafa staðið yfir undanfarnar vikur. Í morgun voru fyrstu einingarnar reistar við eldhúsið og í næstu viku verða svo reistar einingar við þjónusturýmin í Suðurhlið hússins.
Verktaki er Sjammi ehf. og byggingastjóri Sigurjón Skúlason. Veðrið hefur leikið við þá sem vinna við stækkunina, einmuna blíða alla daga og verður vonandi svo áfram.
Fyrsti fundur nýrrar stjórnar Höfða var haldinn í gær. Stjórnina skipa Kristján Sveinsson formaður, Kjartan Kjartansson varaformaður og Guðrún M.Jónsdóttir tilnefnd af bæjarstjórn Akraness og Margrét Magnúsdóttir tilnefnd af sveitarstjórn Hvalfjarðarsveitar. Varamenn eru Helgi Daníelsson, Valdimar Þorvaldsson, Rún Halldórsdóttir og Dóra Líndal Hjartardóttir. Áheyrnarfulltrúi starfsmanna er Hjördís Guðmundsdóttir.
Aðal- og varamenn mættu á þennan fyrsta fund þar sem framkvæmdastjóri og hjúkrunarforstjóri kynntu starfsemi Höfða og stöðu mála. Síðan var farin skoðunarferð um heimilið.
