Í gær var hin árlega sumarferð Höfðafólks. Um 50 íbúar Höfða, dagvistarfólk og íbúar Höfðagrundarhúsa tóku þátt í ferðinni ásamt nokkrum starfsmönnum. Lagt var af stað kl. 13 og ekið austur fyrir fjall. Á Kambabrún kom Guðni Ágústsson landbúnaðarráðherra í bílinn og var leiðsögumaður austan fjalls. Ekið var um Selfoss, Stokkseyri, Eyrarbakka, Ölfus og Hveragerði og drukkið kaffi í hinu glæsilega veitingahúsi Hafið bláa við ósa Ölfusár. Leiðsögn Guðna var einstaklega fróðleg og skemmtileg.

Guðni og Margrét kona hans buðu síðan öllum hópnum upp á veitingar á sólpallinum við heimili sitt á Selfossi þar sem Margrét A.Guðmundsdóttir afhenti Margréti konu Guðna lítinn þakklætisvott fyrir höfðinglegar móttökur og Guðjón Guðmundsson afhenti Guðna áletraða afsteypu af Grettistaki í þakklætisskyni fyrir framlag hans til að gera þessa ferð ógleymanlega. Síðan var ekið heim um hina fögru Þingvallaleið og Mosfellsdal og komið að Höfða kl. 19,20

Veðrið lék við okkur, blæjalogn, sólarlaust og hlýtt. Almenn ánægja var með ferðina, sem tókst í alla staði mjög vel.

Í dag barst Höfða góð gjöf frá hjónunum Sigrúnu Halldórsdóttur og Hring Hjörleifssyni og börnum þeirra, vandað nuddtæki fyrir sjúkraþjálfunardeild.

Elísabet Ragnarsdóttir sjúkraþjálfari þakkaði þessa góðu gjöf og gat þess að þetta tæki kæmi til með að nýtast vel fyrir íbúa heimilisins.

Einar K. Guðfinnsson sjávarútvegsráðherra heimsótti Höfða í dag. Ráðherrann spjallaði við dagvistarfólkið, leit inn hjá mörgum íbúum hússins og heilsaði upp á starfsfólk. Einar hafði orð á því þegar hann kvaddi heimilisandinn væri góður og aðbúnaður allur til fyrirmyndar.

Kaffihúsakvöld var á Höfða í gærkvöldi. Í boði voru kaffi, kökur og léttar veitingar. Gísli S.Einarsson bæjarstjóri sá um að halda uppi fjöri með harmonikkuleik, söng og sögum, Hallgrímur Árnason tók lagið með Gísla, Sigurbjörg Halldórsdóttir fór með ljóð og Eggert Sigurðsson sagði mergjaðar lífsreynslusögur.

Eins og jafnan áður var góð aðsókn að þessu kaffihúsakvöldi, setið á hverju borði í samkomusalnum og létt yfir fólki.

Síðasti fundur núverandi stjórnar Höfða var haldinn í gær. Ný stjórn verður kosin n.k. þriðjudag. Samkvæmt nýrri skipulagsskrá fyrir Dvalarheimilið Höfða fækkar stjórnarmönnum þá úr fimm í fjóra.

Mynd, talið frá vinstri: Inga Sigurðardóttir, Anton Ottesen, Hallveig Skúladóttir, Sigríður Gróa Kristjánsdóttir, Hjördís Guðmundsdóttir fulltrúi starfsmanna og Benedikt Jónmundsson.

Í dag heimsóttu Höfða Gísli S.Einarsson verðandi bæjarstjóri, Gunnar Sigurðsson verðandi forseti bæjarstjórnar og Karen Jónsdóttir verðandi formaður bæjarráðs. Þau spjölluðu við heimilisfólk og starfsmenn og ræddu um rekstur Höfða við framkvæmdastjóra

S.l. föstudag heimsóttu Höfða 19 starfsmenn B-deildar Borgarspítala. Heimsóknin var liður í fræðsludegi deildarinnnar. Sigurbjörg Halldórsdóttir hjúkrunarforstjóri tók á móti gestunum, sýndi þeim heimilið og sagði frá starfsemi Höfða.

Í gær heimsóttu Höfða 21 sjúkraliði frá Sauðárkróki, Blönduósi, Skagaströnd og Hvammstanga. Rakel Gísladóttir trúnaðarmaður sjúkraliða á Höfða og Sigurbjörg Halldórsdóttir hjúkrunarforstjóri tóku á móti þeim og kynntu starfsemi Höfða.

Að lokinni skoðunarferð um Höfða hittu norðlendingarnir nokkra sjúkraliða af Höfða og Sjúkrahúsi Akraness og ræddu við þá yfir kaffibolla.

Starfsmannafélag Höfða bauð til grillveislu í Garðakaffi í fyrrakvöld. Bjarni kokkur grillaði nokkur lambalæri í holu sem hann og Baldur grófu bak við safnaskálann. Yfir 40 starfsmenn mættu og skemmtu hver öðrum til miðnættis. Frábær matur og góð stemning gerðu þessa kvöldstund eftirminnilega.

Frjálslyndi flokkurinn kynnti stefnumál sín í komandi bæjarstjórnarkosningum á Höfða í dag. Frambjóðendur í fjórum efstu sætum listans, Karen Jónsdóttir, Magnús Þór Hafsteinsson, Rannveig Bjarnadóttir og Sæmundur Halldórsson ásamt Guðjóni A.Kristjánssyni alþingismanni kynntu sér starfsemi heimilisins og spjölluðu við íbúa og starfsmenn.