Í gær hélt Kammerkór Akraness söngskemmtun á Höfða. Flutt var úrval laga upp úr Ljóðum og lögum, söngheftum sem Þórður Kristleifsson gaf út á árunum 1939-1949. Meðal þekktra laga sem þarna voru flutt voru Húmar að kvöldi, Efst á Arnarvatnshæðum, Álfareiðin og Við brunninn bak við hliðið.

Þetta var frábær söngskemmtun og troðfullur samkomusalur þakkaði flytjendum með lófataki og uppklappi.

Stjórnandi Kammerkórs Akraness er Sveinn Arnar Sæmundsson.

Í gær og í dag hafa íbúar Höfða staðið í sláturgerð með aðstoð nokkurra starfsmanna. Tekin voru 120 slátur. Mikiill kraftur var í fólki við sláturgerðina og handtökin fagmannleg, enda hafa flestir þeir sem að sláturgerðinni stóðu tekið slátur á hverju hausti í áratugi.

Létt var yfir fólki við sláturgerðina og augljóst að allir höfðu gaman af þessu verkefni. Fyrsta sláturmáltíðin verður framreidd á morgun, en slátrið er mjög vinsæll matur hjá íbúum og starfsfólki Höfða.

Yfirblandari í sláturgerðinni var Svandís Stefánsdóttir.

Í gær komu 57 starfsmenn Höfða heim úr 5 daga fræðslu- og skemmtiferð til Þýskalands. Ferðin byrjaði ekki vel því rútan sem flutti okkur suður á flugvöll ók inn í skriðu á Kjalarnesi með þeim afleiðingum að þrjár konur meiddust nokkuð. Ein þeirra var flutt á slysavarðstofu og var ekki ferðafær. Hún varð því eftir heima sem öllum þótti mjög leitt.

Eftir þetta óhapp gekk ferðin eins og í sögu. Veðrið í Þýskalandi var frábært, 20-25 stiga hiti alla dagana. Ferðin var mjög vel skipulögð og eitthvað um að vera frá morgni til kvölds. Á föstudaginn var heimsótt dvalar- og hjúkrunarheimilið St.Barbara í Koblens, en þar eru álíka margir íbúar og á Höfða. Stjórnendur St.Barbara tóku mjög vel á móti Höfðafólki, kynntu starfsemi heimilisins, sýndu aðstöðuna og buðu loks upp á mat. Þetta er stórglæsileg stofnun og var heimsóknin þangað mjög fróðleg og skemmtileg.

Á laugardal og sunnudag var síðan ekið um Móseldal og Rínardal og stoppað í borgum og bæjum á svæðinu, en þarna er afskaplega fallegt og vinalegt umhverfi. Farið var með Bændaferðum sem lögðu til fararstjóra, Ingu Ragnarsdóttur, sem stóð sig frábærlega og féll vel inn í hópinn. Sigurbjörg Ragnarsdóttir sá um undirbúning og skipulagningu ferðarinnar fyrir starfsmannafélagið og fjölmargir starfsmenn komu að fjáröflun og undirbúningi. Eiga þau öll þakkir skildar fyrir sitt framlag til þessarar stórskemmtilegu ferðar.

Þrjár stúlkur sem unnu við afleysingar á Höfða í sumar héldu tónleika í samkomusalnum í dag, en þær hafa allar verið í tónlistarnámi undanfarin ár. Oddný Björgvinsdóttir lék á harmonikku, Kristín Sigurjónsdóttir á fiðlu og Rut Berg Guðmundsdóttir á þverflautu.

Íbúar Höfða fylltu samkomusalinn og þökkuðu þessum ungu listakonum með kröftugu lófataki.

Að tónleikunum loknum fóru stúlkurnar inn á hjúkrunardeild og léku nokkur lög fyrir þá sem þar dvelja.

Í vor setti Baldur Magnússon nokkrar kartöflur niður í fína blómareit sjúkraþjálfaranna. Sigurður Halldórsson hefur séð um að vökva kartöflugrösin og halda þeim í standi í sumar.

Í gær var svo tekið upp og var uppskeran tólfföld. Nýju kartöflurnar voru bornar fram í mötuneytinu í gær og smökkuðust vel. Sérstaklega þótti þeim Baldri og Sigurði þær góðar.

Í gær tók Höfði þátt í norrænu menningarhátíðinni Reyfi 2007 í Norræna húsinu, en auk fjölbreyttra listkynninga var markaður þar sem seldar voru íslenskar heilsu- og náttúruvörur. Var Höfða boðið að kynna þar og selja grjónapokana sem hér hafa verið framleiddir um langt árabil og fyrir löngu sannað ágæti sitt.

Emilía Petrea Árnadóttir sá um Höfðabásinn þar sem mikill fjöldi sýningargesta leit við til að fræðast um grjónapokana, starfsemi Höfða og almennt um Akranes.

Í gær heimsóttu Höfða 13 íbúar á dvalarheimili aldraðra í Qagortog, vinabæ Akraness í Grænlandi. Gestirnir kynntu sér starfsemi Höfða og litu inn til nokkurra íbúa heimilisins. Grænlendingarnir lýstu mikilli hrifningu á aðbúnaði öllum hér á Höfða. Með þeim í för var Magnús Oddsson fyrrverandi bæjarstjóri sem var leiðsögumaður hópsins í Íslandsheimsókninni.

Að lokum bauð Höfði gestunum upp á kaffi og meðlæti.

Hjónin Ármann Gunnarsson og Helga Sólveig Bjarnadóttir á Steinsstöðum gáfu Höfða s.l. föstudag málverk eftir Bjarna Þór Bjarnason til minningar um foreldra Ármanns, hjónin Guðríði Guðmundsdóttur og Gunnar L.Gunnarsson á Steinsstöðum, en þau voru síðustu bændurnir á Akranesi.

Af þessu tilefni komu systkinin 8 frá Steinsstöðum ásamt mökum og börnum og tengdabörnum Ármanns og Helgu saman á Höfða þar sem Guðjón Guðmundsson framkvæmdastjóri og Anton Ottesen varaformaður stjórnar Höfða veittu þessari fallegu gjöf viðtöku.

Í gær var hin árlega sumarferð Höfðafólks. Um 40 manns, íbúar Höfða, dagvistarfólk og íbúar Höfðagrundarhúsanna, tóku þátt í ferðinni ásamt nokkrum starfsmönnum. Lagt var af stað kl. 13 og ekið að Sundahöfn í Reykjavík og skoðuð hin mikla uppbygging þar. Síðan var ekið til Grindavíkur og að Bláa lóninu, en þaðan haldið til Keflavíkur þar sem drukkið var kaffi í veitingahúsinu Ránni. Síðan var ekið um Garð að Garðskagavita og þaðan til Sandgerðis og síðan sem leið lá heim og komið til Akraness kl. 18,45.

Björn Ingi Finsen var leiðsögumaður í þessari ferð og var leiðsögn hans einstaklega fróðleg og skemmtileg.

Veðrið lék við ferðalangana – logn, sól og 18-20 stiga hiti. Almenn ánægja var með ferðina sem tókst í alla staði mjög vel.