Ljósmyndari: Guðmundur Bjarki Halldórsson.

Síðastliðinn laugardag héldu hinir landskunnu Álftagerðisbræður söngskemmtun á Höfða. Undirleikari var Stefán R.Gíslason. Einn bræðranna, Óskar, var veikur og söng Sveinn Arnar Sæmundsson í hans stað.

Íbúar Höfða og nágrannar á Höfðagrund troðfylltu Höfðasalinn og skemmtu sér vel. Var flytjendum þakkað með kröftugu lófataki fyrir þessa frábæru skemmtun.

S.l. föstudag var opnuð á Höfða sýning á ljósmyndum hjónanna Helgu Guðmundsdóttur og Inga Steinars Gunnlaugssonar. Alls sýna þau um 80 myndir, flestar af fuglum en einnig mannamyndir, landslagsmyndir og listrænar myndir eftir Helgu sem hún nefnir Litaleik.

Við opnunina ávarpaði Guðjón Guðmundsson gesti, Ingi Steinar sagði frá ljósmyndaferli þeirra hjóna og Valgerður Jónsdóttir söng nokkur lög við undirleik Þórðar Sævarssonar.

Mikil aðsókn var að opnuninni og var Höfðasalurinn troðfullur. Mikil hrifning var af myndum þeirra hjóna og óhætt að segja að sýningin hafi slegið í gegn. Sýningin verður á Höfða til 20.mars.

Í morgun heimsóttu um 40 börn af Leikskólanum Vallarseli Höfða. Börnin sungu nokkur lög og var aðdáunarvert hvað vel þau kunnu texta laganna.

Höfðafólk fjölmennti til að hlusta á börnin og hafði gaman af.

Eftir sönginn þáðu börnin djús og smákökur áður en þau héldu aftur í leikskólann.

Nýlokið er hinu árlega Boccia móti Höfða. Að þessu sinni tóku 7 sveitir þátt og var hörð keppni um 1.sætið. Sveitin Ernir sigraði með 27 stig, en sveitina skipuðu Björn Gústafsson, Tómas Sigurðsson og Guðrún Kjartansdóttir. Í öðru til þriðja sæti með 25 stig urður sveitirnar Folar, skipuð Kristjáni Pálssyni, Auði Elíasdóttur og Guðrúnu Jónsdóttur, og sveitin Rúsínur, skipuð Kjartani Guðmundssyni, Ragnari Leóssyni og Lúðvík Björnssyni.

Verðlaunaafhending fór fram í mótslok og fengu 3 efstu sveitirnar verðlaunagripi. Edda, Valey og Adda voru dómarar og stjórnuðu mótinu af röggsemi og léttleika.

Ein starfsmannasveit tók þátt í mótinu og komst ekki með tærnar þar sem íbúarnir höfðu hælana og lenti í næst neðsta sæti.

Í gærkvöldi var haldin tónlistarmessa á Höfða. Þorvaldur Halldórsson söng hugljúf lög og milli laga ræddi sr. Eðvarð um ástina.
Messan var vel sótt og mikil ánægja með þessa ljúfu stund.
 

Einn af föstum siðum á Höfða er að halda þorrablót á bóndadaginn. Þorrablótið var í hádeginu í dag og reiddi Haukur kokkur og hans konur í eldhúsinu fram sérlega glæsilegt hlaðborð þar sem boðið var upp á allar gerðir þorramats og snafs með. Mikil ánægja var með matinn sem var mjög góður.

Í dag heimsótti Árni Múli Jónasson bæjarstjóri Höfða. Í fylgd með honum voru Inga Ósk Jónsdóttir starfsmanna- og gæðastjóri, Laufey Jónsdóttir verkefnastjóri heimaþjónustu og Ragnheiður Þórðardóttir þjónustu- og upplýsingastjóri.

Gestirnir skoðuðu heimilið og heilsuðu upp á íbúa og starfsmenn. Að lokum var svo fundað með stjórnendum Höfða um málefni heimilisins og framtíðarsýn í málefnum aldraðra á starfssvæði Höfða.
 

Í gær var haldið jólaball á Höfða fyrir íbúa, starfsmenn og afkomendur. Hátt í 300 manns á aldrinum tveggja til hundrað og tveggja ára mættu á ballið og skemmtu sér konunglega. Andrea Guðjónsdóttir söng jólalögin við undirleik Bjórbandsins og tveir jólasveinar komu í heimsókn og færðu börnunum gjafir. Að balli loknu þáðu gestir veitingar í boði Höfða.

Þetta er fjölmennasta jólaball sem haldið hefur verið á Höfða og kom sér vel að gott pláss er í nýja Höfðasalnum.

Í morgun var Ragnheiður Guðmundsdóttir djákni með helgistund í Höfðasal þar sem börn hennar og barnabörn sungu jólasálma, en það er árvisst að afkomendur djáknans annast tónlistarflutning á aðfangadag.

Á annan í jólum verður hátíðarguðsþjónusta þar sem sr. Eðvarð Ingólfsson predikar og kór Akraneskirkju syngur.

Á gamlársdag verður svo helgistund djákna, en þar mun kór Saurbæjarkirkju á Hvalfjarðarströnd syngja.