Hin árlega Höfðagleði var haldin s.l. föstudagskvöld. Á Höfðagleði mæta íbúar, starfsmenn, fyrrverandi starfsmenn sem hafa hætt vegna aldurs, læknar og stjórn Höfða, alls um 170 manns.

Boðið var upp á glæsilega þriggja rétta veislumáltíð sem Haukur bryti og hans fólk í eldhúsinu reiddi fram.

Guðjón setti skemmtunina og tilnefndi Anton Ottesen sem veislustjóra. Ásmundur Ólafsson fyrrverandi framkvæmdastjóri flutti hvatningarávarp, Guðrún fótaaðgerðafræðingur og Guðný hárgreiðslukona fluttu létt skemmtiatriði við undirleik Sigríðar Ketilsdóttur, Jóhannes Kristjánsson fór á kostum í gamanmálum og Karlakórinn Pungur söng nokkur lög.

Margrét A.Guðmundsdóttir og Kristján Sveinsson stjórnarformaður stjórnuðu happdrætti þar sem íbúar og starfsmenn fengu góða vinninga í boði Einars Ólafssonar kaupmanns, Kjarnafæðis og Íslensk Ameríska.

Að lokum var dansað við undirleik hljómsveitarinnar Egg og Bacon sem hélt uppi miklu stuði til miðnættis.

Höfðagleðin þótti takast sérlega vel að þessu sinni og voru þátttakendur hæstánægðir með veitingar, skemmtiatriði og músik.

Starfsfólk Höfða gerir oft eitthvað skemmtilegt í aðdraganda hinnar árlegu Höfðagleði, en hún verður haldin í kvöld. Að þessu sinni var starfsfólk hvatt til að mæta í pilsum í vinnuna þessa viku.

Konurnar tóku sig vel út í pilsunum, en ekki tókst að troða neinum þeirra 5 karla sem starfa á Höfða í Skotapils þrátt fyrir ítrekaðar áskoranir kvennanna.

Á myndinni sjást Hildur Bernódusdóttir og Ásta Björk Arngrímsdóttir með Sigurð J.Hauksson umsjónarmann á milli sín.

Í kvöld heimsóttu Höfða rúmlega 50 félagar í Oddfellowstúkunni Egill. Guðjón Guðmundsson og Margrét A. Guðmundsdóttir kynntu þeim starfsemi Höfða og svöruðu fyrirspurnum.

Guðmundur Jónsson þakkaði fyrir hönd gestanna fyrir góðar móttökur og færði Gjafasjóði Höfða peningaupphæð að gjöf. Helga Atladóttir formaður stjórnar sjóðsins veitti gjöfinni viðtöku.

S.l. föstudag var opnuð á Höfða sýning á ljósmyndum hjónanna Helgu Guðmundsdóttur og Inga Steinars Gunnlaugssonar. Alls sýna þau um 80 myndir, flestar af fuglum en einnig mannamyndir, landslagsmyndir og listrænar myndir eftir Helgu sem hún nefnir Litaleik.

Við opnunina ávarpaði Guðjón Guðmundsson gesti, Ingi Steinar sagði frá ljósmyndaferli þeirra hjóna og Valgerður Jónsdóttir söng nokkur lög við undirleik Þórðar Sævarssonar.

Mikil aðsókn var að opnuninni og var Höfðasalurinn troðfullur. Mikil hrifning var af myndum þeirra hjóna og óhætt að segja að sýningin hafi slegið í gegn. Sýningin verður á Höfða til 20.mars.

 Ljósmyndari: Guðmundur Bjarki Halldórsson.

Síðastliðinn laugardag héldu hinir landskunnu Álftagerðisbræður söngskemmtun á Höfða. Undirleikari var Stefán R.Gíslason. Einn bræðranna, Óskar, var veikur og söng Sveinn Arnar Sæmundsson í hans stað.

Íbúar Höfða og nágrannar á Höfðagrund troðfylltu Höfðasalinn og skemmtu sér vel. Var flytjendum þakkað með kröftugu lófataki fyrir þessa frábæru skemmtun.

Í morgun heimsóttu um 40 börn af Leikskólanum Vallarseli Höfða. Börnin sungu nokkur lög og var aðdáunarvert hvað vel þau kunnu texta laganna.

Höfðafólk fjölmennti til að hlusta á börnin og hafði gaman af.

Eftir sönginn þáðu börnin djús og smákökur áður en þau héldu aftur í leikskólann.

Nýlokið er hinu árlega Boccia móti Höfða. Að þessu sinni tóku 7 sveitir þátt og var hörð keppni um 1.sætið. Sveitin Ernir sigraði með 27 stig, en sveitina skipuðu Björn Gústafsson, Tómas Sigurðsson og Guðrún Kjartansdóttir. Í öðru til þriðja sæti með 25 stig urður sveitirnar Folar, skipuð Kristjáni Pálssyni, Auði Elíasdóttur og Guðrúnu Jónsdóttur, og sveitin Rúsínur, skipuð Kjartani Guðmundssyni, Ragnari Leóssyni og Lúðvík Björnssyni.

Verðlaunaafhending fór fram í mótslok og fengu 3 efstu sveitirnar verðlaunagripi. Edda, Valey og Adda voru dómarar og stjórnuðu mótinu af röggsemi og léttleika.

Ein starfsmannasveit tók þátt í mótinu og komst ekki með tærnar þar sem íbúarnir höfðu hælana og lenti í næst neðsta sæti.