Starfslok Bryndísar

Bryndís Guðmundsdóttir hætti störfum í dag eftir tæplega 23 ára starf í eldhúsi Höfða og áður í umönnun. Íbúar kvöddu Bryndísi og færðu henni blóm í þakklætisskyni fyrir góða viðkynningu og elskulegheit.

Söngsystur syngja.

Í dag sungu Auður Árnadóttir, Friðrika Bjarnadóttir, Hulda Óskarsdóttir og Sigríður Ketilsdóttir á hjúkrunardeild Höfða. Þessar heiðurskonur, sem á Höfða ganga undir nafninu söngsystur, heimsækja hjúkrunardeildina reglulega og gera jafnan mikla lukku.

Bingó.

Hið sívinsæla Bingó var spilað í dag, en það er jafnan haldið 1-2 í mánuði og alltaf er vel mætt.
Bingóstjóri hefur verið hin röggsama Margrét Adda og eru góðir vinningar í boði.

 

Grundaskólaheimsókn.

Í dag 15. mars komu krakkar úr bekknum 4.VHJ í Grundaskóla í heimsókn á Höfða. Margrét A.Guðmundsdóttir fór með þau í skoðunarferð um húsið þar sem þau skoðuðu m.a. eldhúsið, handavinnuna, sjúkraþjálfunina, iðjuþjálfunina, þvottahúsið, heita pottinn og tvær íbúðir þar sem þau fengu góðan mola.

 

Þau enduðu á að fara í nokkrar lotur í Boccia í félagsrýminu undir stjórn Ingibjargar Ólafsdóttur, iðjuþjálfa. Börnunum fannst þetta skemmtileg heimsókn og einhver hafði orð á því að vilja flytja hingað strax inn.

 

Nýir íbúar.

Tveir nýir íbúar fluttu á Höfða fyrr í þessum mánuði.


Kristinn Finnsson býr í íbúð 106.


Sigríður Beinteinsdóttir býr í íbúð 105.

Þau eru boðin velkomin á Höfða.

Heimsókn starfsfólks Sjúkrahúss Akraness.

Í gær heimsóttu 12 hjúkrunarfræðingar og sjúkraliðar af A-deild Sjúkrahúss Akraness Höfða og kynntu sér tæki, búnað og starfsemi heimilisins. Elísabet Ragnarsdóttir, Sólveig Kristinsdóttir og Sigurbjörg Halldórsdóttir tóku á móti þessum góðu gestum sem létu vel af heimsókninni.

Höfðagleði.

Hin árlega Höfðagleði var haldin í kvöld. Þar mættu íbúar, starfsmenn, fyrrverandi starfsmenn og stjórn Höfða, alls um 170 manns. Margrét A.Guðmundsdóttir setti skemmtunina og stjórnaði henni. Sigríður Gróa Kristjánsdóttir formaður stjórnar flutti ávarp, borin var fram frábær þrírétta máltíð sem Bjarni bryti og hans fólk töfraði fram og gerði mikla lukku.

 

 

Sá landskunni Raggi Bjarna skemmti gestum með söng og gamanmálum með aðstoð Þorgeirs Ástvaldssonar, Sylvía Nótt kom fram, leikin af Kristínu Sigurjónsdóttur, dregið var í happdrætti og Guðjón Guðmundsson og Eggert Sigurðsson sögðu sögur. Þá stjórnaði Ingibjörg Ólafsdóttir iðjuþjálfi stórskemmtilegu atriði þar sem hún fékk 4 karlmenn, Ásmund Ólafsson, Benedikt Jónmundsson, Magga G.Ingólfsson og Reyni Þorsteinsson til að klæða sig í sokka með sokkaífæru. Enginn þeirra hafði vald á þessu með góðu móti, en Ingibjörg úrskurðaði að allir væru þeir erkiklaufar,en Reynir væri sigurvegari og afhenti honum konfektkassa í verðlaun.

Að lokum var dansað til miðnættis við undirleik Jóns Heiðars Magnússonar, Geirs Guðlaugssonar og Guðmundar Jóhannssonar.

 

Almenn ánægja var með veitingar, skemmtiartiði og músík og óhætt að segja að Höfðagleðin hafi tekist einstaklega vel.

Umhverfisráðherra heimsækir Höfða.

Sigríður Anna Þórðardóttir umhverfisráðherra heimsótti Höfða í dag ásamt aðstoðarmanni sínum Haraldi Johannessen og bæjarfulltrúum Sjálfstæðisflokksins á Akranesi. Ráðherra leit inn í nokkrar íbúðir og spjallaði við íbúa og starfsmenn. Hún skoðaði síðan iðjuþjálfun, sjúkraþjálfun og dagvistun og fékk sér síðan kaffisopa með stjórnendum Höfða sem kynntu henni starfsemi heimilisins.