Fulltrúar Sambands borgfirskra kvenna komur færandi hendi til okkar á Höfða í gær.
Þær Valgerður Björnsdóttir formaður, Gerður K. Guðnadóttir gjaldkeri og Heiðrún Sveinbjörnsdóttir meðstjórnandi færðu Höfða að gjöf gjafabréf og er andvirði þess ætlað til kaupa á búnaði sem nýtist heimilisfólki á Höfða. Kjartan Kjartansson framkvæmdastjóri og Sigurlín Gunnarsdóttir húsmóðir veittu styrknum móttöku og þökkuðu fyrir höfðinglega gjöf sem mun nýtast vel á Höfða.
Hjúkrunar- og dvalarheimilið Höfði á Akranesi auglýsir stöðu hjúkrunarforstjóra lausa til umsóknar.
Á Höfða eru 75 íbúar, 56 í hjúkrunarrýmum og 19 í dvalarrýmum. Nánari upplýsingar um heimilið er hér á heimsíðunni.
Hjúkrunarforstjóri hefur faglega forustu og ábyrgð á sviði hjúkrunar og umönnunar á heimilinu. Stjórnar faglegri þróun, rekstri og starfsmannahaldi heimilisins á sviði hjúkrunar og umönnunar.
Menntunar- og hæfnikröfur:
Gerð er krafa um íslenskt hjúkrunarleyfi.
Framhaldsmenntun í stjórnun og rekstri æskileg.
Góð tölvukunnátta áskilin.
Reynsla og þekking á rekstri og stjórnun á sviði öldrunarmála er æskileg.
Framúrskarandi færni í mannlegum samskiptum er áskilin sem og hæfni til að vinna sjálfstætt og skipulega.
Leitað er að einstaklingi með áhuga á öldrunarmálum og vilja til að takast á við krefjandi verkefni.
Laun eru samkvæmt kjarasamningi Félags íslenskra hjúkrunarfræðinga og launanefndar sveitarfélaga.
Umsóknarfrestur er til og með 18. janúar 2016.
Nánari upplýsingar um stöðu hjúkrunarforstjóra veitir:
Kjartan Kjartansson framkvæmdastjóri, sími 856-4302
netfang: kjartan@dvalarheimili.is
Umsókn og ferilskrá ásamt rökstuðningi fyrir hæfni í starfið sendist á netfangið kjartan@dvalarheimili.is. Umsókn má einnig senda til framkvæmdastjóra Höfða, Sólmundarhöfða 5, 300 Akranesi.
Öllum umsóknum verður svarað.
Íbúar, starfsmenn og stjórn Höfða senda lesendum heimasíðunnar bestu kveðjur og óskir um gott og farsælt komandi ár.
Í dag var haldið jólaball á Höfða fyrir íbúa, starfsmenn og afkomendur. Höfðasalurinn var fullur af gestum, sá yngsti eins árs, sá elsti á tíunda áratugnum, og skemmtu sér allir konunglega.
Tveir jólasveinar komu í heimsókn og færðu börnunum poka með góðgæti. Bjórbandið spilaði gömlu góðu jólalögin og gestirnir dönsuðu kringum jólatréð.
Að balli loknu þáðu gestir veitingar í boði Höfða.
Í morgun var Ragnheiður Guðmundsdóttir djákni með helgistund í Höfðasal þar sem börn hennar og barnabörn sungu jólasálma og léku undir, en það er árvisst að afkomendur djáknans annast tónlistarflutning í helgistund á aðfangadag.
Á annan í jólum verður hátíðarguðsþjónusta kl. 12.45 þar sem sr. Eðvarð Ingólfsson predikar og kór Akraneskirkju syngur við undirleik Sveins Arnars Sæmundssonar.
Á gamlársdag verður svo helgistund djákna kl. 11.30, en þar mun kór Saurbæjarkirkju á Hvalfjarðarströnd syngja.
Óskum öllum landsmönnum gleðilegrar jólahátíðar.
Óskum öllum gleðilegra jóla og farsældar á nýju ári.
Þökkum ánægjuleg samskipti á árinu sem er að líða.
Íbúar og starfsfólk Höfða.
Í gærkvöldi buðu starfsmenn íbúum til samverustundar í aðdraganda jóla. Annarsvegar var samverustund á Innri-Hólmi fyrir íbúa Innri- og Ytri Hólms og hinsvegar á Leyni fyrir íbúa Leynis og Jaðars. Starfsmennirnir komu með margskonar góðgæti að heiman og buðu íbúunum. Mikil ánægja var með þessa notalegu kvöldstund og þetta skemmtilega framtak starfsmannanna.
Grundartangakórinn hélt sína árlegu jólatónleika á Höfða í gær. Stjórnandi kórsins er Atli Guðlaugsson og einsöngvarar Bjarni Atlason, Guðlaugur Atlason og Smári Vífilsson. Undirleik annaðist Flosi Einarsson.
Tónleikarnir voru vel sóttir og góður rómur gerður að þeim.
Síðastliðinn föstudag var hið árlega jólahlaðborð Höfða haldið og komu fjölmargir aðstandendur og borðuðu með sínu fólki. Helgin endaði svo með aðventustund á sunnudag sem var í umsjón Séra Eðvarðs Ingólfssonar og Séra Þráins Haraldssonar. Allir þessir viðburðir voru vel sóttir og almenn ánægja með þá.
Starfsmenn og íbúar Höfða halda markað og vöfflukaffi laugardaginn 21. nóvember í Höfðasal frá kl. 14.00 til 16.00.
Allir velkomnir.
