Friðrik Magnússon útgerðarmaður og skipstjóri á Keili 2. AK gaf Höfða hátt á annað hundrað rauðmaga sem hann fékk í grásleppunetin í gær. Haukur kokkur og Skarphéðinn Árnason íbúi á Höfða stóðu á bryggjunni og gerðu að rauðmaganum í norðan næðingi og frosti, en Skarphéðinn er gamalreyndur hrognkelsaveiðimaður.
Það verður því rauðmagaveisla á Höfða í hádeginu í dag.
Þrír herramenn á dagdeild Höfða, Vignir, Ármann og Tómas, tóku þátt í mottukeppni Krabbameinsfélags Íslands sem staðið hefur yfir í þessum mánuði. Ekki verður annað sagt en að vel hafi tekist til hjá þeim félögum.
Á föstudaginn langa mun starfsfólk Höfða lesa Passíusálmana í Akraneskirkju. Ragnheiður Guðmundsdóttir djákni stjórnar athöfninni sem hefst kl. 13,00. Með henni lesa Guðrún Björnsdóttir, Helga Atladóttir, Margrét A.Guðmundsdóttir, Rakel Gísladóttir, Sigurbjörg Ragnarsdóttir og Þóranna Kjartansdóttir.
Í dag heimsótti Höfða 39 manna hópur úr félagsstarfi eldri borgara á Seltjarnarnesi. Með þeim í för var bæjarstjórinn Ásgerður Halldórsdóttir.
Margrét A.Guðmundsdóttir og Helga Jónsdóttir sýndu gestunum starfsemi dagdeildar og annað sem í gangi er á heimilinu.
Að því loknu var gestunum boðið upp á kaffi og meðlæti. Þar ávarpaði Guðjón Guðmundsson gestina og sagði frá uppbyggingu Höfða og starfsemi.
Gestirnir létu í ljós mikla hrifningu af heimilinu. Héðan lá leið þeirra niður í bæ þar sem þau ætluðu að líta inn á fleiri staði.
-150x150.jpg)
-150x150.jpg)
-150x150.jpg)
-150x150.jpg)
-150x150.jpg)
Börn úr leikskólanum Akraseli voru í hjólatúr og litu við á Höfða í leiðinni. Þau tóku lagið, prófuðu lyfturnar og skoðuðu það sem fyrir augu bar.
Það er alltaf upplífgandi þegar yngsta kynslóðið kemur í húsið.
S.l. laugardag heimsóttu Höfða 42 konur úr Félagi handavinnuleiðbeinenda. Komu þær víða af landinu. Helga Jónsdóttir deildarstjóri dagdeildar tók á móti þeim og sagði frá starfseminni á Höfða og bauð þeim upp á kaffi og konfekt.
Í gær var haldinn fundur með aðstandendum íbúa á Höfða. Þar sagði Guðjón Guðmundsson framkvæmdastjóri frá yfirstandandi og fyrirhuguðum framkvæmdum við endurbætur og stækkun Höfða, Reynir Þorsteinsson læknir ræddi um læknisþjónustu á Höfða og lífsskrá, Margrét A.Guðmundsdóttir forstöðukona lýsti félagsstarfi og afþreyingu á heimilinu og Elísabet Ragnarsdóttir sjúkraþjálfari sagði frá sjúkraþjálfun á Höfða. Frummælendum sátu síðan fyir svörum ásamt Helgu Atladóttur hjúkrunarforstjóra sem var fundarstjóri.
Fundurinn var mjög vel sóttur. Boðið var upp á kaffi og meðlæti að lokinni dagskrá.
Í gær var guðsþjónusta á Höfða á æskulýðsdegi þjóðkirkjunnar. Af því tilefni sungu ungmennakórar Akraneskirkju undir stjórn Sveins Arnars Sæmundssonar. Prestur var sr. Eðvarð Ingólfsson.
Í dag heimsótti stjórn Framkvæmdasjóðs aldraðra Höfða, þau Rannveig Guðmundsdóttir formaður, Unnar Stefánsson, Bernharður Guðmundsson, Dagmar Huld Matthíasdóttir og Helgi Hjálmsson. Með þeim í för voru Ólafur Gunnarsson öldrunarlæknir, Guðbjartur Hannesson formaður fjárlaganefndar og Vilborg Ingólfsdóttir frá Félagsmálaráðuneytinu.
Benedikt Jónmundsson formaður stjórnar Höfða, Helga Atladóttir hjúkrunarforstjóri, Margrét A.Guðmundsdóttir húsmóðir og Guðjón Guðmundsson framkvæmdastjóri tóku á móti gestunum og sýndu þeim heimilið. Guðjón kynnti þeim starfsemi Höfða og fyrirhugaðar framkvæmdir við stækkun þjónusturýma og lokaða deild fyrir heilabilaða.
Gestir og heimamenn ræddu ítarlega um stækkunarhugmyndir, en fyrir stjórn Framkvæmdasjóðs aldraðra liggur umsókn Höfða vegna næsta framkvæmdaáfanga.
-640x372.jpg)
