Á síðasta fundi stjórnar Höfða var tekin fyrir og samþykkt jafnréttisstefna  fyrir Höfða.  Stefnan tekur til starfsmanna, íbúa og aðstandenda þeirra:

Jafnréttisstefna Höfða

Markmið: Markmið jafnréttisstefnunnar er að leggja áherslu á jafnan rétt karla og kvenna til launa, stöðuveitinga, starfa og þátttöku í nefndum og störfum á vegum Höfða innan allra starfsstétta. Starfsmenn Höfða skulu njóta sömu tækifæra, réttinda og starfsaðstæðna óháð kyni, þjóðerni og trúarbrögðum.

Skilgreining: Stefna Höfða í jafnréttismálum er að vinna markvisst að því að jafna stöðu kynjanna innan heimilisins. Í áætlunni eru sett upp markmið og viðbragðsáætlanir til að ná þessum markmiðum. Auk þess sem endurskoðun fer reglulega fram. Jafnréttisstefnan er sett fram samkvæmt lögum um jafnan rétt og jafna stöðu karla og kvenna nr. 96/2000.

Launajafnrétti

“Konum og körlum er starfa hjá sama atvinnurekanda skulu greidd jöfn laun og skulu njóta sömu kjara fyrir jafnverðmæt og sambærileg störf. Með launum í lögum þessum er átt við almennt endurgjald fyrir störf og hvers konar frekari þóknun, beina og óbeina, hvort heldur er með hlunnindagreiðslum eða með öðrum hætti, sem atvinnurekandi greiðir starfsmanni sínum fyrir vinnu hans. Með jöfnum launum er átt við að laun skulu ákveðin á sama hátt fyrir konur og karla og að þau viðmið sem lögð eru til grundvallar launaákvörðun feli ekki í sér kynjamismunun. Með kjörum í lögum þessum er, auk launa, átt við lífeyris-, orlofs- og veikindarétt og hvers konar önnur starfskjör eða réttindi sem metin verða til fjár.” 14. grein 96/2000

Markmið: Gæta þess að karlar og konur fái sömu laun og njóti sömu kjara fyrir sambærileg störf.

Framkvæmd: Árleg endurskoðun á launamun með tölfræðilegri samantekt. Leiðrétta laun ef óútskýrður munur er til staðar.

Ábyrgð: Framkvæmdastjóri.

Endurskoðun: Árlega.

Laus störf

”Starf sem laust er skal standa opið jafnt konum og körlum.” 15. grein 96/2000.

Markmið: Laus störf á Höfða skulu standa opin bæði fyrir karla og konur

Framkvæmd: Allar auglýstar stöður skulu vera opnar fyrir bæði karla og konur. Samantekt um auglýst störf á hverju ári.

Ábyrgð: Framkvæmdastjóri og hjúkrunarforstjóri.

Endurskoðun: Árlega.

Starfsþjálfun og endurmenntun

”Atvinnurekendur skulu tryggja að konur og karlar njóti sömu möguleika til endurmenntunar og starfsþjálfunar og til að sækja námskeið sem haldin eru til að auka hæfni í starfi eða til undirbúnings öðrum störfum.” 15. grein 96/2000.

Markmið: Tryggja að starfsþjálfun og endurmenntun sé aðgengileg báðum kynjum. Greining á sókn kynjanna í starfsþjálfun og endurmenntunarnámskeið

Ábyrgð: Hjúkrunarforstjóri, deildarstjórar og húsmóðir.

Endurskoðað: Árlega.

Samræming fjölskyldu- og atvinnulífs

”Atvinnurekendur skulu gera nauðsynlegar ráðstafanir til að gera konum og körlum kleift að samræma starfsskyldur sínar og skyldur gagnvart fjölskyldu. Ráðstafanir þær skulu m.a. miða að því að auka sveigjanleika í skipulagningu á vinnu og vinnutíma þannig að tekið sé tillit til þarfa atvinnulífs og fjölskylduaðstæðna starfsmanna, þar með talið að þeim sé auðveldað að koma aftur til starfa eftir fæðingar- eða foreldraorlof eða leyfi úr vinnu vegna óviðráðanlegra og brýnna fjölskylduaðstæðna (force majeure).” 16. grein 96/2000.

Markmið: Sveigjanlegur vinnutími í boði. Auk þess að vinnuskýrslur liggi frammi með réttum fyrirvara vegna áherslu á að samhæfa fjölskyldulíf og vinnutíma.

Framkvæmd: Kynna möguleika á sveigjanlegum vinnutíma. Kynna starfsemi Höfða hvað varðar samhæfingu fjölskyldulífs og vinnutíma.

Ábyrgð: Hjúkrunarforstjóri, deildarstjórar og húsmóðir.

Kynning: Á deildarfundi ár hvert.

Jafnréttisstefna fyrir íbúa og aðstandendur

 Markmið: Stefna Höfða er að allir íbúar og aðstandendur, njóti jafns réttar án tillits til kyns, trúarbragða, skoðana, þjóðernisuppruna, kynþáttar, kynhneigðar, litarháttar, efnahags, ætternis, fötlunar, aldurs og stöðu að öðru leyti. Jafnréttisáætlun Höfða er ætlað að vera mikilvægur liður í gæðaumbótum á heimilinu.

Framkvæmd: Allir íbúar og skráðir aðstandendur skulu eiga jafnan aðgang að upplýsingum um starfsemi heimilisins. Komið skal til móts við ólíkar þarfir íbúa og jafnan skal þess gætt að þjónustan og verklag sé miðað við bæði kynin.

Ávallt skal skrá bæði kynin sem aðstandendur þar sem því er við komið til að skapa jafnan rétt aðstandenda til upplýsinga óháð kyni.

Ábyrgð: Hjúkrunarforstjóri og deildarstjóri.

 

Ágreiningsmál

Ef upp kemur ágreiningur vegna jafnréttismála þá er hægt að vísa honum til stjórnar Höfða. Stjórnin kallar inn fleiri ef þurfa þykir til að leysa ágreiningsmál.

Endurskoðun jafnréttisstefnu Höfða

Jafnréttisstefnu ber að endurskoða reglulega til þess að markmið og framkvæmdaáætlanir séu í samræmi við daglegt starf á Höfða. Endurskoða skal jafnréttisstefnuna í lok október hvert ár og oftar ef þurfa þykir. Þessi jafnréttisstefna er unnin eftir lögum um jafna stöðu og jafnan rétt kvenna og karla nr. 96/2000 auk þess sem stuðst var við leiðbeiningar við gerð jafnréttisáætlunar frá Jafnréttisstofu frá árinu 2007.

 

Íbúar, starfsmenn og stjórn Höfða senda lesendum heimasíðunnar bestu kveðjur og óskir um gott og farsælt komandi ár.

Í gær var haldið hið árlega jólaball á Höfða fyrir íbúa, starfsmenn og afkomendur. Höfðasalurinn var fullur af gestum, sá yngsti eins árs, sá elsti á tíunda áratugnum, og skemmtu sér allir konunglega.

Tveir jólasveinar komu í heimsókn og færðu börnunum poka með góðgæti. Bjórbandið spilaði gömlu góðu jólalögin og gestirnir dönsuðu kringum jólatréð.

Að balli loknu þáðu gestir veitingar í boði Höfða.

 

Í morgun var Ragnheiður Guðmundsdóttir djákni með helgistund í Höfðasal þar sem börn hennar og barnabörn sungu jólasálma og léku undir, en það er árvisst að afkomendur djáknans annast tónlistarflutning í helgistund á aðfangadag.
Á annan í jólum verður hátíðarguðsþjónusta kl. 12.45 þar sem sr. Eðvarð Ingólfsson predikar og kór Akraneskirkju syngur við undirleik Sveins Arnars Sæmundssonar.
Á gamlársdag verður svo helgistund djákna kl. 11.30, en þar mun kór Saurbæjarkirkju á Hvalfjarðarströnd syngja.

Óskum öllum gleðilegra jóla og farsældar á nýju ári.

Þökkum ánægjuleg samskipti á árinu sem er að líða.

Íbúar og starfsfólk Höfða.

 

Gerum góðverk er samfélagsverkefni í hönnun og smíði í Brekkubæjarskóla.  Brekkubæjarskóli er Grænfánaskóli og hefur sparnað, endurvinnslu og endurnýtingu að leiðarljósi.

Nemendur í hönnun og smíði í 1.-7. bekk skáru niður kertaafganga bræddu og endurunnu í ný kerti.  Þeir seldu kertin síðan í verslunum á Akranesi. Einnig seldu nemendur kortin á árlegum Höfðabasar í desember.

Tilgangur verkefnisins var að kynna fyrir nemendum hvernig hægt væri að láta gott af sér leiða með vinnu og endurnýtingu án þess að kosta mikið til.  Ágóði kertasölunnar rennur óskertur í gjafasjóð Höfða til kaupa á fjölþjálfa fyrir aldraða í sjúkraþjálfun.

Elísabet Ragnarsdóttir sjúkraþjálfari Höfða tók á móti afrakstri söfnunarinnar í morgunstund í Brekkubæjarskóla sl. fimmtudag. Fjölþjálfi fyrir aldraða er dýrt tæki, en margt smátt gerir eitt stórt, en krakkanir söfnuðu rúmum 60.000 krónum fyrir að nýta það sem margir henda.

Við þökkum innilega fyrir þetta fallega góðverk og framtak krakkana og kennara þeirra.  Það voru kennararnir Kristrún Sigurbjörnsdóttir og Ingibjörg Torfadóttir sem stjórnuðu verkefninu.

Takk fyrir okkur.

Í vikunni, á kvöldvöku sem haldin var af starfsmönnum fyrir íbúa Höfða, voru afhentar árlegar starfsaldursviðurkenningar. Að þessu sinni fengu eftirtaldir 12 starfsmenn viðurkenningu:

Fyrir 5 ára starf: Elísabet Ösp Pálsdóttir, Helga Dóra Sigvaldadóttir, Jón Atli Sigurðsson, Margrét Ósk Vífilsdóttir, Valey Björk Guðjónsdóttir og Sigrún Jóhannesdóttir.

Fyrir 10 ára starf: Ólöf Elfa Smáradóttir.

Fyrir 15 ára starf: Guðmunda Maríasdóttir, Hildur Bernódusdóttir og María Kristinsdóttir

Fyrir 20 ára starf: Gréta Jóhannesdóttir og Sóley Sævarsdóttir.

Kjartan Kjartansson framkvæmdastjóri sagði að með þessum viðurkenningum vildi stjórn Höfða þakka þessum góðu starfsmönnum tryggð þeirra við Höfða og íbúa heimilisins og sagði að starfsfólkið væri helsti styrkleiki Höfða.

Við sama tækifæri kvaddi Höfðafólk starfsmenn sem látið hafa af störfum  á Höfða á síðustu mánuðum eftir farsælan starfsferil, þær Erna Kristjánsdóttir félagsliði, Ragnheiður Guðmundsdóttir sjúkraliði og Sigríður Sigurlaugsdóttir sjúkraliði.  Samtals höfðu þær starfað á Höfða í um 77 ára.  Þó svo Ragnheiður láti af störfum sem sjúkraliði mun hún starfa áfram sem djákni á Höfða.

Um leið og Kjartan þakkaði störf þeirra og rakti farsælan starfsferil afhenti hann þeim blömvönd og litla gjöf frá Höfða. Kjartan óskaði þeim góðs gengis á ókomnum árum og að þau mætti njóta eftirlaunaáranna við góða heilsu og farsæld.

Hin árlega kvöldvaka þar sem starfsmenn Höfða bjóða íbúum upp á skemmtiatriði og veitingar var haldin í vikunni. Borð svignuðu undan girnilegum kræsingum sem starfsmenn komu með að heiman og boðið var upp á fjölbreytta dagskrá.

Undir borðahaldi lék Sveinn Rúnar Sigurðsson læknir heimilisins.  Patrekur Orri Unnarsson söng og spilaði á gítar, vinkonurnar María Einarsdóttir og Rakel Eyjólfsdóttir fluttu tvö lög og að lokum spilaði Fanney Karlsdóttir íbúi á Höfða á harmonikku.

Mikil ánægja var með þessa kvöldvöku sem heppnaðist mjög vel.

Í tengslum við Vökudaga á Akranesi voru tvær sýningar opnaðar á Höfða.

Fyrst ber að nefna sýninguna „Það sem augað mitt sér“ sem er ljósmyndasýning 5 ára barna í leikskólanum Garðaseli.

Auk þess var opnuð samsýning Elínborgar Halldórsdóttur (Ellý) sem sýndi myndlist og glerlist og hópsins Skraddaralýs sem er hópur kvenna úr Hvalfjarðarsveit auk kvenna af Akranesi og Borgarnesi sem sýndu bútasaum.

Við opnunina sá Tindatríó og Sveinn Arnar um tónlistarflutning.

Guðjón Brjánsson oddviti Samfylkingarinnar í Norðvesturkjördæmi  heimsótti Höfða í dag ásamt aðstoðarmönnum. Þeir skoðuðu heimilið og heilsuðu upp á íbúa, dagdeildarfólk og starfsfólk.

Frambjóðendur Sjálfstæðisflokksins, þau Haraldur Benediktsson í 1.sæti og Þórdís Kolbrún R. Gylfadóttir í 2.sæti, heimsóttu Höfða í morgun. Þau skoðuðu heimilið og heilsuðu upp á íbúa, dagdeildarfólk og starfsfólk.