Góðan dag kæru vinir og velunnarar

Höfði hjúkrunar- og dvalarheimili hefur í ljósi stöðunnar sem uppi er ákveðið að kalla eftir vöskum einstaklingum sem væru tilbúnir til að vera í Bakvarðasveit Höfða ef upp koma þær aðstæður að okkar öflugu starfsmenn forfallast.

Okkar starfsemi eru þannig að það er ekki hægt að minnka eða hætta þjónustu og við þurfum að hafa starfsfólk til taks allan sólarhringinn alla daga.

Starfsemin nær yfir marga þætti, hjúkrun, umönnun, aðhlynningu, félagsstarf og margt fleira. Og eins og á öðrum heimilum þá þarf að elda mat og þrífa.

Við leitum því til allra þeirra sem hafa tök á að veita tímabundna aðstoð með skömmum fyrirvara og mynda þannig bakvarðasveit um okkar mikilvægu starfsemi.

Reynsla af störfum er kostur en ekki skilyrði. Við viljum vera viðbúin hinu versta en vonum það besta.

Þeir sem vilja skrá sig í bakvarðasveitina sendi póst á netfangið o.ingibjorg@dvalarheimili.is merkt bakvarðasveit.

Með vinsemd og þakklæti
Ólína Ingibjörg Gunnarsdóttir
Hjúkrunarforstjóri Höfða

Áríðandi tilkynning til íbúa, ættingja og starfsfólks Höfða vegna sýkingar af völdum Kórónaveirunnar (COVID-19) á Íslandi.

Stjórn og stjórnendur Höfða hefur tekið þá ákvörðun að loka hjúkrunarheimilinu fyrir heimsóknum ættingja og annarra gesta frá og með 7. mars 2020 þar til annað verður formlega tilkynnt. Er þetta gert að höfðu samráði við Sóttvarnarlækni og Landlækni eftir að Neyðarstigi almannavarna var lýst yfir í gær. Höfði er hér að fylgja eindregnum tilmælum þessara aðila sem eru í framvarðasveit Almannavarna Íslands.

 Heilsa og velferð íbúanna þarf alltaf að vera í forgangi !

Nú er staðfest að smit vegna Kórónaveirunnar hafa borist á milli einstaklinga í þjóðfélaginu. Þar sem íbúar Höfða eru flestir aldraðir og / eða með ýmsa undirliggjandi sjúkdóma eru þeir í sérstökum áhættuhóp tengt því að veikjast alvarlega af Kórónaveirunni.

Leita þarf allra leiða til að draga úr þeirri hættu að íbúar heimilsins veikist af Kórónaveirunni. Okkur þykir mjög leitt að þurfa að taka svo stóra ákvörðun en þetta er gert með velferð íbúanna okkar í huga og biðjum við fólk að sýna þessari ákvörðun virðingu og skilning. Það er ljóst að það getur reynst íbúa mjög erfitt að fá ekki heimsóknir frá ættingjum sínum og á sama hátt getur það reynst ættingjum íbúans mjög erfitt að heimsækja hann ekki.  Það er samt nauðsynlegt að grípa til þessarra ráðstafana til að koma í veg fyrir að íbúi veikist af veirunni og eins geta smit borist frá ættingjum eins íbúa til annars íbúa.

Jafnframt verður umferð allara annara gesta en nauðsynlegs starfsfólks á vakt, takmörkuð inn á Höfða og gerðar hafa verið sérstakar reglur um það. Svo sem birgja með vörur, iðnaðarmenn og aðra sem þurfa að koma inn á heimilið.

Varðandi símtöl inn á heimilið og upplýsingar um líðan heimilisfólks þá bendum við á bein númer inn á hvert heimili sem nálgast má á www.dvalarheimili.is

Dagdvöl aldraðra á Höfða verður lokuð meðan lokun heimilisins varir.

Einnig er mikilvægt að þið kynnið ykkur upplýsingar og leiðbeiningar á vef Landlæknisembættisins www.landlaeknir.is Þar eru greinargóðar upplýsingar og leiðbeiningar tengdar stöðu málar, en þær geta breyst frá degi til dags.

 F.h. Höfða hjúkrunar- og dvalarheimilis

Kjartan Kjartansson                             Ólína Ingibjörg Gunnarsdóttir             framkvæmdastjóri                                hjúkrunarforstjóri                                      Sími 856-4302                                         Sími 856-4304

Íbúar Höfða eru í sérstökum áhættuhóp tengt því að veikjast alvarlega af Kórónaveirunni. Við viljum því biðja þá sem eru með kvefeinkenni, flensulík einkenni eða hafa ferðast nýlega til skilgreindra áhættusvæða samkvæmt upplýsingum á vef Landlæknis að gæta varúðar og koma ekki í  heimsóknir á Höfða. 

Mikilvægt er að þeir sem eru frískir, hafa ekki verið á skilgreindum áhættusvæðum og hafa því ekki ástæðu til að ætla að þeir hafi smitasta af veirunni hafi eftirfarandi í huga:

• Handþvottur er mikilvægasta ráðið til að forðast smit og einnig er mikilvægt að nota handspritt. Hafið þetta alltaf í huga þegar komið er inn á Höfða.
• Forðist alla líkamlega snertingu eins og hægt er svo sem handabönd, faðmlög og kossa við íbúa.
• Forðist að koma við snertifleti í almennum rýmum svo sem handriði og hurðarhúna.

Við bendum ykkur á að kynna ykkur leiðbeiningar á vef Landlæknisembættisins https://www.landlaeknir.is/  því staða mála og leiðbeiningar þeim tengdar geta breyst dag frá degi.

Kjartan Kjartansson framkvæmdastjóri

Ólína Ingibjörg Gunnarsdóttir hjúkrunarforstjóri